Қашқадарё вилояти Халқ таълими бошқармаси Яккабоғ туманида мактаб ўқувчиси ўқитувчи томонидан калтаклангани айтилган хабарларга муносабат билдирди.

Ижтимоий тармоқларда Яккабоғдаги мактаб ўқувчисини ўқитувчиси аёвсиз калтаклагани айтилган хабарлар тарқалди. Ҳолат вилоят Халқ таълими бошқармаси ва тегишли масъуллар иштирокида ўрганилган.

Аниқланишича, мактаб ўқувчиси П.Ж. дарсларга фаол иштирок этиб келган. Шунингдек, ижтимоий тармоқларда уни ургани ҳақидаги маълумотлар ёлғон, асоссиз экани маълум бўлган. Яккабоғ туманидаги 71-мактаб ўқувчиси П.Ж. ва унинг онаси, синф раҳбари, мактаб директори вазифасини вақтинча бажарувчи, унинг ўринбосарлари билан Халқ таълими бошқармаси ва тегишли масъуллар иштирокида суҳбатлашилган ва тегишли тартибда ўрганиш ишлари амалга оширилган.

«Бурним тез-тез қонаб туради. Бу мени ўқитувчи урди деганимас-ку?. Менинг расмимдан нотўғри фойдаланишган. Устозларимни доим ҳурмат қиламан», — деган ўқувчи.

Аввалроқ Бухородаги таълим муассасасида ўқитувчи ўқувчини бўғгани, Бандихон туманида ўқитувчи дарсга тайёрланмаган ўқувчини калтаклагани тўғрисида хабар берганди. Шунингдек, Андижон вилояти Асака туманида ўқитувчи кетма-кет икки кун дарсдан қочиб кетиши ва дарс жараёнларига қатнашмаётгани сабаб ўқувчи қизни калтаклаганди.