Самарқандда мижозларга интим хизмат кўрсатиб келган 11 массажчи ушланди — видео
Самарқанд шаҳрида массаж ниқоби остида фуқароларга интим хизмат кўрсатаётганлар аниқланди. Бу ҳақда вилоят Ички ишлар бошқармаси хабар берди.
Қайд этилишича, тунги хизматга жалб этилган ИИО ҳамда тегишли соҳа хизматлари ходимлари тунда фаолият юритаётган SPA-салонларни кўздан кечирди. Текширувлар давомида Самарқанд шаҳар «Боғи Темур» маҳалласи Лутфий кўчасида жойлашган массажхонада 6 нафар қиз мижозларга хизмат кўрсатаётгани аниқланган. Улар ноқонуний фаолият юритиб, шу атрофда яшовчиларнинг осойишталигини бузиб келган.
Шунингдек, Юсуд Ҳамадоний кўчасида жойлашган SPA-салон кўздан кечирилганида 5 нафар массажчи қиз мижозларга хизмат кўрсатаётгани маълум бўлган. Иккала ҳолатда ҳам ушбу қизлар тегишлилик бўйича ҳудудий ИИБга олиб борилган ва ҳужжатлар расмийлаштирилган. Ҳолат бўйича қонуний қарор қабул қилиниши учун иш судга юборилган.
Аввалроқ Андижон шаҳрида массаж хизматлари кўрсатиш учун ажратилган бинода қўшмачилик билан шуғулланган аёл ушлангани ҳақида хабар берилганди. Шунингдек, Тошкент шаҳрида йўловчи аёлларга массаж таклиф қилган такси ҳайдовчисига суд ҳукми ўқилгани хабар қилинганди.
