Туркия жануби-шарқида содир бўлган зилзила 500 та атом бомбаси кучига тенг. Бу ҳақда мамлакат Фавқулодда вазиятлар вазирлиги бошқармасининг Хатарларни камайтириш департаменти (AFAD) раҳбари Орхан Татар журналистларга маълум қилди, деб хабар беради Anadolu.

«Ҳалокатли эффектни ҳосил қилган биринчи зилзила давомийлиги 65 сонияни ташкил этди. Иккинчи зилзила 45 сония давомида ҳалокатли таъсир кўрсатган. Минтақа, тахминан, 2 дақиқа давомида кучли силкиниб турган. 7,7 магнитудали зилзила оқибатида чиққан энергия 500 та атом бомасиникига тенг», — дейди Татар.

Бундан олдин турк геофизиги Аҳмет Эржан Duvar газетасига берган интервьюсида зилзилани юзлаб ядровий бомбалар портлашидан ҳосил бўлган кучга таққослаганди. Унинг сўзларига кўра, эпицентрдан 200 километр радиусда яқин 2-3 йилда яна кучли ер ости силкинишлари юз бериши мумкин.

Haber7 нашри зилзила оқибатида ҳосил бўлган энергия СССР томонидан 1961 йилда синовдан ўтказилган тарихдаги энг кучли бомба — «Царь-бомба»дан ҳам ортиқ бўлганини ёзган. Ушбу бомбанинг қуввати Хиросимага ташланган Америка бомбасиникидан 3,3 минг баробарга ортиқ эди.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатли ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Аввалроқ Истанбулда 2030 йилга қадар магнитудаси 7,6 балли зилзила содир бўлиши мумкинлиги маълум қилинганди. Ўтган 15 йил давомида олимлар мазкур хавотирли прогнозларни тасдиқловчи кўплаб ҳисоб-китобларни эълон қилган (эҳтимоллик даражаси 35 дан 95 фоизгача — 2045 йилга қадар). Кенг кўламли ер ости силкинишларини прогнозлаштириш билан нафақат турк тадқиқотчилари, балки АҚШ, Италия, Франция, Япония мутахассислари ва ҳатто халқаро суғурта фирмалари ҳам шуғулланган.