Россия Швейцарияга ўхшаб федералистик моделга ўтиши мумкин. Бу ҳақда россиялик мухолифатчи, собиқ олигарх Михаил Ходорковский маълум қилди, деб хабар беради Deutsche Welle.

Кремль танқидчиси ва собиқ нефть магнати, 10 йил қамоқда ўтирганидан кейин хорижга чиқариб юборилган Михаил Ходорковский бошқа мухолифлар билан бирга Россияда давлатчиликни қайта ташкил этиш ва ҳокимиятни ўзгартириш таклифи билан чиқмоқда. У Швейцариянинг Blick газетасига берган интервьюсида гап мамлакатнинг парчаланиши ҳақида эмас, балки федерал модель ҳақида кетаётганини айтган.

«Иккита йўл бор. Биринчиси — бу Югославия модели бўлиб, унда Россия бир нечта давлатга бўлиб юборилади. Бу жуда хавфли бўлиб, ядровий можаролар ва янги диктатураларни келтириш чиқариши мумкин. Мен тўлиқ қайта қуриш йўли ва худди Швейцария каби парламентдан федералистик моделга ўтиш тарафдориман», — дейди ҳозирда Лондонда яшаётган Ходорковский.

Унинг сўзларига кўра, Россия элитасини «бошини йўқотишдан» қўрқмасдан, ҳукуматдан юз ўгира олишига ишонтириш керак. Ходорковскийнинг таъкидлашича, Россияда қаршилик бор, аммо у «режим қимирлашни бошлаганидан кейингина кўзга кўрина бошлайди». Собиқ олигархнинг айтишича, у ва унинг шериклари ўз ғояларини ижтимоий тармоқлар орқали жамоатчиликка етказмоқчи, шунингдек, элита вакиллари билан алоқада бўлиб турибди.

Ходорковский давлатни қайта қуриш учун камида 20 йил керак бўлишини айтган. «Айни вақтда Россиянинг ривожланиш даражаси худди Германия Иккинчи жаҳон уруши якунлангандаги ҳолатда», — дейди у.

Аввалроқ АҚШ бош прокурори Меррик Гарланд «Сарград» телеканали асосчиси Константин Малофеевнинг мусодара қилинган активлари Украина эҳтиёжлари учун берилишини эълон қилганди.

Константин Малофеев 2014 йилдан буён АҚШ санкциялари остида қолиб келади. Мамлакат ҳукумати уни Қримнинг Украинадан ажралишига кўмаклашган Россия фуқароларини молиялаштиришда гумонлаган. 2022 йил баҳорида АҚШ ҳукумати бизнеменни ушбу санкцияларни четлаб ўтишда айблаган. 2023 йил февралда Америка суди прокуратурага Малофеевнинг активларини мусодара қилишга рухсат берганди. Бизнесменнинг ўзи эса Forbes’га берган интервьюсида гап 2014 йилга музатилган пуллар ҳақида кетаётганини тасдиқлаган.