Жанубий Корея—Ўзбекистон бизнес ассоциацияси директорлар кенгаши раиси Ким Чанг Кеон бошчилигидаги ишбилармонлар делегацияси Сирдарё вилояти ҳокими вазифасини бажарувчи Акмалжон Маҳмудалиев билан учрашди, дея хабар бермоқда «Дунё». Учрашувда ўзаро манфаатли ҳамкорликнинг истиқболлари борасида фикр алмашилди.

Шунингдек, томонлар ўртасида йўлга қўйилган алоқалар натижасида қишлоқ хўжалиги, саноат ишлаб чиқариш, таълим, фавқулодда вазиятлар билан курашиш, шунингдек, вилоятда Жанубий Корея стандартларидаги шаҳарсозлик нормаларини жорий этиш борасида амалий натижаларга эришилаётгани қайд этилди.

Бундан ташқари, учрашувда Жанубий Корея билан ҳамкорликда вилоятда шаҳар инфратузилмасини ривожлантириш ва мактабгача таълим соҳасидаги ҳамкорликни кенгайтириш бўйича фикр алмашилди. Хусусан, Гулистон шаҳрида қатор афзалликларга эга бўлган «ақлли шаҳар» барпо этиш лойиҳаси муҳокама қилинди.

Аввалроқ Жанубий Корея Ўзбекистондаги қишлоқ хўжалиги техникаларини экологик тоза ёнилғига ўтказиш учун 10 миллион доллар маблағ ажратишни режалаштираётгани, шунингдек, Ўзбекистон ва Жанубий Корея ўртасида экология бўйича ўзаро англашув баёноти имзолагани ҳақида хабар берилганди.