Қурилиш ва уй-жой коммунал хўжалиги вазирлиги Андижон шаҳрида қурилиши якунланмаган бино бузилиб кетгани айтилган хабарларга муносабат билдирди.

Ижтимоий тармоқларда Андижон шаҳридаги ҳали қурилиши якунланмаган уйлардан бири бузилиб кетгани тасвирланган видео тарқалди. Ҳолат бўйича вилоят қурилиш соҳасида назорат инспекцияси томонидан ўрганиш ишлари олиб борилган.

Аниқланишича, объектнинг қурилиш ишлари 2022 йил март ойида бошланган. Назорат тадбирлари давомида фуқаро И.Усмонов тегишли шаҳарсозлик ҳужжатларисиз, инспекцияни хабардор қилмасдан, объектга қўшимча 2 қават (4−5-қават) қўшиб, қурилиш ишларини амалга оширган.

Ҳолат бўйича фуқаро И.Усмоновга Маъмурий жавобгарлик тўғрисидаги кодекснинг 99-моддаси 7-қисми (объектларни давлат экспертизасининг лойиҳа-смета ҳужжатларига, шу жумладан, иш ҳужжатларига доир ижобий хулосасисиз, шунингдек, қурилиш соҳасида назорат қилиш ва йўл-қурилиш ишлари сифатини назорат қилиш инспекцияларининг рухсатномасисиз қуриш) билан маъмурий чора қўлланган.

Қурилиш ишлари давомида бинодаги темир-бетон плиталарининг қулаб тушиши ва бино юқори қаватларидаги деворлар бузилишига ишчилар томонидан темир-бетон плиталар устига меъёрдан (меъёр бўйича 1 метр квадрат юзага 800 килограмм юк тушиши белгиланган, лекин ушбу юзага 1400−1500 килограмм атрофида юк жойланган) ортиқ қурилиш материаллари юклангани ҳамда юкларни автокранда тушириш жараёнида динамик қўйиш ҳосил бўлиши сабаб бўлган.

Инспекция томонидан объектнинг шаҳарсозлик ҳужжатларисиз қурилган ва яроқсиз ҳолга келган 4 ва 5-қаватларини фуқаро И.Усмонов томонидан техника хавфсизлик талабларига қатъий риоя этган ҳолда бузиб (демонтаж) олиши кераклиги тушунтирилган, бинонинг 5-қавати демонтаж қилинган.

Ҳозирда И.Усмоновнинг молиявий муаммолари сабаб бинонинг 4-қаватини бузиш ва қурилиш ишларини давом эттириш вақтинча тўхтатилган. Объектнинг демонтаж ишларини бажариш ва қурилишни давом эттириш инспекция томонидан назоратга олинган.

Аввалроқ Қурилиш ва уй-жой коммунал хўжалиги вазирининг биринчи ўринбосари Даврон Одилов Ўзбекистонда қурилаётган объектларга буюртмачилар масъул эканини маълум қилганди. Унинг бу гапи ижтимоий тармоқларда кенг муҳокамаларга сабаб бўлгач, Қурилиш вазирлиги ҳолатга расмий муносабат билдирган. Қурилиш вазирлигига кўра, тақдим этилган видеолавҳада гап қурилишда жавобгар аввало, буюртмачи экани хусусида борган. Боиси буюртмачи техник назорат бўйича мутахассисни бириктиради ёки ушбу фаолият турини амалга ошириш ҳуқуқига эга бўлган юридик шахсни шартнома асосида жалб қилади.