Америкалик ҳарбийлар томонидан уриб туширилган номаълум учар объектлар Ерга оид бўлмаслиги мумкин. Бу ҳақда Шимолий Америка Ҳарбий-космик мудофаа қўмондонлиги (NORAD) раҳбари генерал Глен ван Хёркка таяниб Reuters хабар берди.

Ван Хёркдан ҳарбийлар ушбу объектлар ўзга сайёрага тегишли бўлиши мумкинлигини истисно этадими, дея сўраган.

«Мен разведка жамияти ва контрразведкага буни аниқлаш имконини бераман. Айни вақтда ҳеч нарсани истисно этмайман», — деган у.

Ван Хёркнинг сўзларига кўра, АҚШ ҳарбийлари мазкур объектлар ниманинг ҳисобига ҳавода муаллақ тургани ва қаердан учиб келганини аниқлай олмаган. «Биз бекордан бекорга уларни ҳаво шарлари эмас, объектлар демаяпмиз», — таъкидлайди у.

Февраль бошидан бери АҚШ ҳудудида уч маротаба учар объект уриб туширилди. Хусусан, 4 февраль куни америкалик ҳарбийлар Шимолий Каролина қирлоқларида Хитойга тегишли, мамлакат ҳаво маконида салкам бир ҳафта учган аэростатни уриб туширган. Вашингтон ушбу ҳаво шаридан жосуслик ва разведка маълумотларини тўплашда фойдаланилган деб ҳисоблайди. Пекин эса буни рад этиб, аппаратдан метеорологик мақсадларда фойдаланилгани ва АҚШ ҳудудига тасодифан кириб қолганини маълум қилди. Хитой ТИВ Қўшма Штатларни «ҳарбий кучини суиистеъмол қилишда» айблаган ва бундай ҳаракатлар давлатлар ўртасидаги муносабатларга зарар келтиришини айтган.

10 февраль куни эса Оқ уй Қўшма Штатлар Аляска узра аэростат уриб туширилганини эълон қилган, унинг қолдиқлари денгизга тушганди. Америка администрацияси аппарат кимга тегишли эканига аниқлик киритмаган.

12 февраль кечқурун конгрессмен Жек Бергман америкалик ҳарбийлар Канада чегарасидаги Гурон кўли узра учар объектни уриб туширганини маълум қилган. Кейинроқ Пентагон буни тасдиқлаган. Идоранинг маълум қилишича, объект ҳарбий инфратузилма устидан учиб ўтган ва хавф туғдирган. Бундан бир сутка олдин Канада шимолида ҳам номаълум учар объект уриб туширилганди.

Аввалроқ АҚШ Конгресси Вакиллар палатаси спикери Нэнси Пелосининг оролга ташрифи туфайли Хитой билан Ғарб муносабатлари ёмонлашган. Чунки Хитой томони бунга норозилик билдирган ва ҳарбий машғулотлар ўтказишни бошлаганди. Натижада АҚШ президенти Жо Байден Хитой Тайванга ҳужум уюштирадиган бўлса, Қўшма Штатлар оролни ҳимоя қилишга тайёр эканини билдирганди. Шундан сўнг Си Цзиньпин Хитой Тайванга нисбатан куч ишлатиш ҳуқуқидан ҳеч қачон воз кечмаслигини маълум қилганди.