Буюк Британия ва Украинанинг юқори мартабали мудофаа саноати вакиллари Украинада қурол ҳамда ҳарбий техникаларни биргаликда ишлаб чиқаришни йўлга қўйиш имкониятини муҳокама қилмоқда, деб хабар беради The Telegraph.

Нашр маълумотларига кўра, Украина ҳукумати билан бундай музокараларни Европанинг бошқа мудофаа корхоналари ҳам олиб бормоқда, бироқ инглиз амалдорлари Германия ва Франциядаги рақобатчилари улардан ўзиб кетмаслиги учун мамлакатга ташриф буюрган.

Газетанинг қайд этишича, бундай корхоналар Украинани Ғарб давлатлари томонидан қуроллар етказиб берилишига қарамлигини камайтиради, аммо ҳарбий экспертларнинг таъкидлашича, россиялик ҳарбийлар бундай объектларни эътиборсиз қолдирмайди. «Танк заводи кичик эмас. Тўғрисини айтадиган бўлсак, агарда мен Путин бўлганимда, яксон қиладиган биринчи жойим шу бўларди», — дейди мудофаа бўйича мустақил эксперт Френсис Туса.

Бундан ташқари, Тусанинг таъкидлашича, Россия Ғарб мудофаа корхоналарининг Украина ҳудудида пайдо бўлишини провокация дея ҳисоблаши мумкин. Шу билан бирга, Россия таҳдидлари Европа давлатларига якуний қарор қабул қилишга таъсир кўрсатмайди.

Буюк Британия Мудофаа вазирлиги ва мамлакат бош вазири канцелярияси вазиятга изоҳ беришдан бош тортган.

Аввалроқ Исроил бош вазири Украинага «Темир қубба» тизими етказиб берилишини истисно этмаганди. Россия ТИВ расмий вакили Мария Захарова Нетаньяхунинг сўзларига муносабат билдириб, «қурол-яроғ етказиб беришга бўлган барча уринишлар, ҳатто ниятлар даражасида бўлса ҳам, инқирознинг кучайишига олиб келишини» айтган.

Январда АҚШ ҳукумати Украинага 2,2 миллиард долларлик янги ҳарбий ёрдам пакетини тайёрлаётгани маълум бўлганди. Унинг ичидан узоқ масофага мўлжалланган ракеталар ўрин олади. Гап Boeing ва Saab Group компаниялари томонидан ишлаб чиқарилган GLSDB (Ground Launched Small Diameter Bomb) ракеталари ҳақида кетмоқда. Улар 150 километр узоқликка парвоз қила олади. Украина узоқ масофага мўлжалланган ракеталарга муҳтож ва Ғарб ҳамкорларига бундай қуроллар мамлакат ташқарисидаги нишонларга қарши қўлланилмаслигига кафолат беришга тайёрлигини билдирган.