Эрон 2022 йилда Россияга катта радиусда ҳаракат қилишга қодир жанговар учувчисиз учиш аппаратлари партиясини берган. Бу ҳақда ўз манбаларига таяниб The Guardian хабар берди.

Қайд этилишича, Москва ва Теҳрон ўртасидаги битим ноябрь ойида келишилган. Ўшанда Россия делегацияси олтида «Муҳожир-6», шунингдек, 12 та Shahed 191 ва 129 ларни етказишга келишиб олган. Эрон томонидан Россияга олдинлари етказиб берилган камикадзе-дронлардан фарқли ўлароқ, ушбу аппаратлардан кўп маротаба фойдаланаса бўлади — зарбани амалга оширгач, улар базага қайтади.

Газетанинг аниқлик киритишича, Россия анча замонавий дронлар етказиб берилишидан манфаатдор, чунки Украина Қуролли Кучлари Shahed-131 ҳамда Shahed-136 ни самарали уриб туширишга ўрганиб олган.

Манбаларнинг қайд этишича, дронлар Россияга иккита йўналишда олиб келинмоқда — бир қисми Эрон кемалари орқали юкни Каспий денгизидаги Россия Ҳарбий-денгиз кучлари кемаларига топширяпти. Қолганлари Эрон давлат авиакомпанияси томонидан етказилмоқда. Эрон дронлар билан бирга, россиялик ҳарбийларга ёрдам бериш учун 54 нафар инструктордан иборат гуруҳни ҳам юборган.

The Guardian’нинг ёзишича, Россияга етказилган учувчисиз учиш аппаратлари январь охирларида ҳаво ҳужумига учраган Исфаҳон шарҳидаги заводда жойлашган. Нашр версиясига кўра, бу Россияга дронлар етказиб берилишини сўроқ остига қўяди, чунки фабрикага жиддий зарар етган.

Эслатиб ўтамиз, Эроннинг «Муҳожир-6» ва Shahed жанговар дронларининг биринчи партияси 30 августь куни Россияга етказилганди. Техника радар, артиллерия ва бошқа ҳарбий нишонларга зарба бериш имконига эга ҳисобланади. Бироқ россиялик ҳарбийлар дронлардаги техник муаммолар туфайли хариддан норози бўлган. Кейинроқ Эрон Россияга қурол сотилганини билвосита тасдиқлаган.