Ижтимоий тармоқларда Жиззах вилояти, Янгиобод туманининг Учтургон қишлоғида фуқаро томонидан бўрининг сўйилиши акс этган суратли хабар юзасидан Табиат ресурслари вазирлиги Жиззах вилояти бошқармаси экологик инспекцияси томонидан ўрганиш олиб борилди.

Аниқланишича, ушбу ҳолат Янгиобод тумани «Ҳавотоғ» ҚФЙнинг Учтургон қишлоғида яшовчи фуқаро Ж.З. томонидан икки йил олдин содир этилгани аниқланди. Ҳолат юзасидан Маъмурий жавобгарлик тўғрисидаги кодекснинг 90-моддаси, 1-қисмига асосан айбланувчига нисбатан маъмурий баённома расмийлаштирилиб, БҲМнинг ўн баравари миқдорида жарима қўлланилган.

Бундан ташқари, яна бир ҳолатда 11 февраль куни Айдар-Арнасой кўллар тизими бўлими ҳудудидан фуқаро А.К. ўзига тегишли бўлган ов милтиғида Ўзбекистон «Қизил китоб»ига киритилган 1 бош оққушни ноқонуний равишда овлагани аниқланди.

Ҳолат юзасидан ушбу фуқарога нисбатан Маъмурий жавобгарлик тўғрисидаги кодекснинг 94-моддаси, 1-қисмига асосан маъмурий баённома расмийлаштирилди. Шунингдек, унга нисбатан ҳайвонот дунёсига етказилган зарар учун БҲМнинг 50 баробари миқдорида жарима белгиланиб, тўпланган ҳужжатлар суд органларига тақдим этиш учун тайёрланмоқда.

Шунингдек, рейд тадбири давомида яна бир фуқаро ўзига тегишли бўлган ов милтиғи ёрдамида ов йўлланмасида белгиланганидан ортиқ 5 та қашқалдоқ ва 1 та ёввойи ўрдакни ноқонуний равишда овлагани маълум бўлди. Ҳолат юзасидан унга нисбатан БҲМнинг 10 баробари мидорида жарима қўлланилган ҳамда ҳайвонот дунёсига етказилган зарар учун 1 миллион 800 минг сўм белгиланиб, ҳужжатлар тегишли тартибда суд органларига тақдим қилинмоқда.

Аввалроқ Жиззахда қармоқ ёрдамида сақоқушни овлаган шахс ушлангани ҳамда Рио Олимпиадаси чемпиони Фазлиддин Ғоибназаровдан қуш овлагани учун тушунтириш хати олгани ҳақида хабар берилганди.