Бухоро вилояти Когон магистраль газ қувурлари бошқармасининг «КС-1» компрессор станциясида 2022 йил 11 июн куни техноген тусдаги фавқулодда вазият рўй берган эди. «Ўзтрансгаз»нинг маълум қилишича, етказилган талафотлар жадал суръатларда бартараф этилди ва цех тез муддатда тикланди.

Таъкидланишича, шу пайт қадар станция биноси қуриб битказилди. Металл конструкцияларини монтаж қилиш пудратчи ташкилот томонидан амалга оширилди. Икки навбатда ташкиллаштирилган иш жараёнида 60 га яқин мутахассис, 20 га яқин махсус техникадан фойдаланилди.

Қайд этилишича, мавжуд қувурларни таъмирлаш ишлари якунига етди, станцияга 4 та двигатель ўрнатиб бўлинган. Электр тармоғини тортиш ишлари ҳам якунига етиб қолди. Мутахассислар двигателларни автоматлаштириш (КИПиА) ишларини якунлангач, цех фойдаланишга топширилади.

«Станциянинг ёнғин хавфсизлигини таъминловчи сув тармоғи ҳам бутунлай янгиланмоқда. Бинонинг ташқи фасади сендвич панеллар билан қопланди, ичкарида сўнгги пардозлаш ишлари олиб бориляпти», дейилади хабарда.