Ўзбекистонда 13–17 февраль кунлари об-ҳаво беқарор бўлиши кутилмоқда, деб хабар беради «Ўзгидромет». Республика ҳудуди бўйича вақти-вақти билан асосан ёмғир кўринишидаги ёғингарчилик бўлади.

Қайд этилишича, тоғолди ва тоғли ҳудудларда ёғингарчилик, 16–17 февралда баъзи жойларда кучли ёмғир ва қор кўринишидаги ёғингарчилик бўлади. 14–16 февралда республиканинг айрим ҳудудларида шамол тезлиги 15–20 метр/секундгача кучайиши кутилмоқда. Баъзи жойларга туман тушиши мумкин.

Ушбу ҳафтанинг ҳарорат фони февраль ойининг ўртаси учун бўлган иқлимий меъёрга яқин бўлади. Кечалари ҳаво ҳарорати 0–5 даража илиқ, кундуз кунлари асосан 6–11 даража илиқ атрофида бўлади. Республика шимолида ҳафтанинг биринчи ярмида кечалари 5–10 даража совуқ, кундуз кунлари 0–5 даража илиқ, иккинчи ярмида эса кечалари 2–7 даража совуқ, кундуз кунлари 2–7 даража илиқ бўлади.

Пойтахтда 14–15 ва 17 февраль кунлари вақти-вақти билан бир оз ёмғир ёғади, 16 февралда ёмғир ёғади. Ҳаво ҳарорати кечалари 0–3 даража илиқ, кундуз кунлари 7–10 даража илиқ атрофида бўлади.

Аввалроқ Ўзбекистоннинг айрим ҳудудларида 14 февраль, сешанба куни қор ёғиши кутилаётгани тўғрисида хабар берилганди.

Эслатиб ўтамиз, 3 февралдан Ўзбекистон ҳудудига Каспий денгизи ҳудудларидан нам ҳаво массалари кириб келиши бошлаганди. Шундан кейин ҳаво ҳарорати 20 даражагача исиди. Республика Гидрометеорология маркази 10 февраль куни Ўзбекистоннинг айрим ҳудудларига қор ёғишини маълум қилди. 13 февраль куни эса баъзи жойларда ҳарорат 12 даражагача исиди.