Ферутдин Зокиров исмли Ўзбекистон фуқароси Россия Мудофаа вазирлигига тиббиёт техникаларини етказиб беришдаги фирибгарликда гумонланиб ҳибсга олинди, деб хабар беради «Коммерсантъ».

Маълумотларга кўра, 2020 йил баҳорда Россия мудофаа вазири Сергей Шойгу коронавирус инфекциясининг тарқалиши муносабати билан Мудофаа вазирлиги Ҳарбий-тиббий бош бошқармаси эҳтиёжлари учун тиббий асбоб-ускуналар ва шахсий ҳимоя воситалари харид қилишни топширган.

Пандемия туфайли Европа ва АҚШдан етказиб беришларда қийинчиликлар юзага келгач, ҳарбий идора хитойлик ишлаб чиқарувчилар билан келишишга уринган. Сунъий нафас олдириш аппаратлари (ИВЛ)га талаб ортиб кетгани сабаб бирорта тиббиёт компанияси уларнинг ўз вақтида етказилишига кафолат бермаган. Натижада Федерал давлат унитар корхонаси бошлиғи ўринбосари Лариса Леонтьева умумий танишлари орқали машҳур дизайнер ва кийим-кечак модельери Ферутдин Зокировга чиққан. У эса ўз навбатида танишлари орқали зарур тиббий асбоб-ускуналар етказиб берилишини ваъда қилган.

Тиббий товарлар рўйхатига Зокиров Yuwell YH-730 ИВЛ аппаратларини киритган. 2020 йил баҳорида умумий ҳисобда ҳарбий идора 400 миллион рубль (5,5 миллион доллар) тўлаб, 350 та шу каби аппаратни олган. Аммо буюртмачи ИВЛ аппаратлари ўрнига «уйқу апноэси» синдромидан (нафас йўллари билан боғлиқ уйқунинг бузилиши) азият чекувчи беморлар учун мўлжалланган қурилмаларни қиммат нархда олгани маълум бўлган.

Ферутдин Зокиров ва Лариса Леонтьевага нисбатан Россия қонунчилигига мувофиқ жиноят иши қўзғатилган.