Туркияда 6 февраль куни содир бўлган кучли зилзилалар қурбонлари сони 29,6 минг кишига етди. Бу ҳақда мамлакат Фавқулодда вазиятларнинг олдини олиш ва уларнинг оқибатларини бартараф этиш бошқармасига (AFAD) таяниб Anadolu агентлиги хабар берди.

Қайд этилишича, ҳозирга қадар ер ости силкинишлари оқибатида талафот кўрган ҳудудлардан қарийб 148 минг киши эвакуация қилинган.

AFAD маълумотларига кўра, Қаҳраманмарашдаги Пазаржик ва Эльбистон туманларида юз берган иккита зилзиладан кейин яна 2,4 мингдан ортиқ афтершоклар қайд этилган.

Шу билан бирга, Суриянинг Ҳалаб, Алеппо, Хамо, Латакия ва Раққа вилоятларида ҳалок бўлганлар сони 3,5 минг кишидан ошган. Табиий офат жойида 233 мингдан ортиқ қутқарувчи иш олиб бормоқда. Туркиялик ҳамкасбларига дунёнинг кўплаб давлатларидан, жумладан, Ўзбекистондан ҳам қутқарувчилар ёрдам бермоқда.

Маълум қилинишича, зилзилалардан кейин ота-онасиз ёки қаровсиз қолган 574 бола топилган бўлиб, уларнинг 503 нафарининг шахсига аниқлик киритилган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Ўз навбатида Жаҳон соғлиқни сақлаш ташкилоти Туркиядаги кучли зилзиладан омон қолганлар очиқ ҳавода ва «даҳшатли шароитда» қолган бўлиб, бу ер ости силкинишлари оқибатида ҳалок бўлганлар сонига тенг яна шунча қурбонларни юзага келтириши мумкинлигини маълум қилган.