АҚШ президенти Жо Байден администрацияси Украина ҳукумати уруш траекториясини ўзгартиришнинг ҳал қилувчи вақти келгани ҳақида огоҳлантирди, деб хабар беради The Washington Post.

Оқ уй ходимларининг ҳисоблашича, Россия баҳорда ҳужумни бошлайди, Украина эса бой берилган ҳудудларни қайтариш учун контрҳужумга ўтиши мумкин. Кейинги ойлар кескин кечиши ҳақида Украина ҳукуматига январь ойида Киевга келган америкалик амалдорлар маълум қилганди.

Америкалик ҳарбий таҳлилчиларнинг айтишича, Украина қўшинлари учун бир вақтнинг ўзида Донецк вилоятидаги Бахмут шаҳрини ҳимоя қилиш ва баҳорда контрҳужумни бошлаш қийин. The Washington Post суҳбатдошларининг таъкидлашича, агарда Украина Россия қўшин юборган барча йўналишда уруш олиб борса, бу рус ҳукуматининг фойдасига ишлайди.

АҚШ Киевга босим ўтказишни кучайтирган, чунки Оқ уй Конгресси Украинага олдингидек ёрдам ажратишга эришиши тобора қийинлашиб боради. Бунга айрим республикачиларнинг қўллаб-қувватловни қисқартириш борасидаги чиқишлари сабаб бўлмоқда. Ҳозирда Жо Байден аминистрацияси Конгресс билан украинага 10 миллиард доллар миқдорида ёрдам ажратишни муҳокама қиляпти. Янги ёрдам пакети Россияга қарши янги санкциялар билан бирга кейинги ҳафтада эълон қилиниши кутилмоқда.

АҚШ ҳукумати Украинани имкон қадар узоқ қўллаб-қувватлашга тайёрлигини айтяпти, шу билан бирга, ёзга бориб Киев Американинг ҳозирги ёрдам пакетини сарфлаб бўлади, шундан кейин можарони сиёсий йўл билан ҳал этиш қийинлашади.

Январда АҚШ ҳукумати Украинага 2,2 миллиард долларлик янги ҳарбий ёрдам пакетини тайёрлаётгани маълум бўлганди. Унинг ичидан узоқ масофага мўлжалланган ракеталар ўрин олади. Гап Boeing ва Saab Group компаниялари томонидан ишлаб чиқарилган GLSDB (Ground Launched Small Diameter Bomb) ракеталари ҳақида кетмоқда. Улар 150 километр узоқликка парвоз қила олади. Украина узоқ масофага мўлжалланган ракеталарга муҳтож ва Ғарб ҳамкорларига бундай қуроллар мамлакат ташқарисидаги нишонларга қарши қўлланилмаслигига кафолат беришга тайёрлигини билдирган.