Қўшма Штатлар Украинадаги уруш чўзилиб кетса, замонавий жанговар самолётларни тақдим этиши ёки бошқа давлатларга F-16 қирувчиларини қайта экспорт қилишга рухсат бериши мумкин. Бу ҳақда Financial Times Вашингтондаги манбасига таяниб хабар берди.

Газета маълумотларига кўра, қирувчиларни етказиб бериш 14 февраль куни Брюсселда ўтказиладиган НАТОга аъзо давлатларнинг мудофаа вазирлари учрашувида муҳокама қилинади. Манбанинг айтишича, Киев учун мазкур масала жанговар ўқ-дориларининг етказиб берилиши каби «муҳим аҳамиятга эга».

Шу билан бирга, нашр АҚШ президент Жо Байден Вашингтон Украинага F-16 қирувчиларини етказиб бермаслигини айтганини эслатиб ўтган. Аммо манбалар Вашингтон «уруш чўзилиб кетса», ўз қарорини ўзгартириши мумкинлигини истисно этмаяпти. Ёки мамлакат бошқа давлатларга F-16 қирувчиларини топширишга рухсат бериши мумкин.

Аввалроқ Ғарб давлатлари Украина расмийларининг ташаббуси билан Киевга реактив қирувчи самолётларни етказиб бериш имкониятини муҳокама қилишни бошлаганди. Манбага кўра, Вашингтон Киевга «ҳозирда самолётларни юбориш имконсиз» эканини айтган. Унинг айтишича, Украинанинг Ғарб томонидан қўллаб-қувватланиши масаласида «қизил чизиқ» мавжуд бўлиб, 2022 йили у HIMARS залп ўт очиш ракета тизимларини етказиб беришга таъсир кўрсатган, бироқ эътиборга олинмаган эди. Бу каби вазият танкларни юборишда ҳам кузатилган.

Эслатиб ўтамиз, декабрь охирларида АҚШ Украинага 1,85 миллиард долларлик янги ёрдам пакетини расман эълон қилганди. Шунингдек, январь бошларида Донецкдаги «ПТУ»га берилган ракета зарбалари оқибатида камида 63 нафар россиялик ҳалок бўлгани, АҚШ Украинага Stryker зирҳли транспортёрларини етказиб бериши маълум бўлган.