Telegram’даги «Потребитель Бухара плюс» гуруҳида февраль бошларида Бухородаги Mega market дўконидан харид қилинган «буханка» нонлардан сичқонларнинг ахлати чиққани ҳақида пост эълон қилинганди. Рақобатни ривожлантириш ва истеъмолчилар ҳуқуқларини ҳимоя қилиш қўмитаси мазкур ҳолатни ўрганиб чиқди.

Қайд этилишича, қўмитанинг Бухоро вилояти ҳудудий бошқармаси «Истеъмолчиларнинг ҳуқуқларини ҳимоя қилиш тўғрисида»ги қонуннинг 6 (товар (иш, хизмат)лар тўғрисидаги маълумот) ва 12-моддалари (истеъмолчининг товар (иш, хизмат) хавфсиз бўлишига талаб қўйиш ҳуқуқи) талаблари бузганлиги ҳолати бўйича иш қўзғатилди.

«Шунингдек, истеъмолчиларга етказилган зарарни қоплаш юзасидан иш якунига кўра ишлаб чиқарувчи корхонага тегишли кўрсатма берилади», дейилади муносабатда.

Бундан ташқари, Санитария-эпедимиология ва осойишталик хизмати ходимларини жалб этган ҳолда савдо шохобчаси ва ишлаб чиқарувчи корхонада санитария меъёрларига риоя этилиши бўйича ўрганишлар ўтказилган.

Аввалроқ Фарғонадаги ўнлаб боғчаларга сифатсиз гўшт етказиб берилаётгани ва Самарқандда боғча ошпази пишган овқатга хом товуқ гўшти солгани аниқланганди. Шунингдек, Тошкент вилоятидаги боғчада болалар оммавий заҳарлангани юзасидан қўшимча маълумот берилганди.