Жиззах, Самарқанд ва Бухоро вилоятларида 462,4 миллион сўмлик қалбаки пулларни тайёрлаб, муомалага киритганликда гумон қилиниб, олти нафар шахс қўлга олинди. Бу ҳақда Жиззах вилояти ИИБ матбуот хизмати хабар берди.

Қайд этилишича, 3 февраль куни Жиззах вилоятининг Пахтакор туманида ички ишлар ходимлари томонидан Paynet орқали пластик картага 4,3 миллион сўм қалбаки пул ўтказган шахслар қўлга олинган.

Тергов давомида Жиззах вилоятида яшовчи икки нафар фуқаро ҳам қўлга олиниб, улардан 10 дона Paynet чеки, 39 дона банк квитанцияси ва битта пластик картаси олиб қўйилган. Уларнинг кўрсатмаларига кўра, Paynet’нинг тўртта шохобчасидан 4,5 миллион сўм олинган.

Маълум бўлишича, қўлга олинганлардан бири қурилиши тугалланмаган кўп қаватли уйга яна 18 миллион қалбаки сўм яширган. Тергов жараёнида у Самарқанд вилояти Пайариқ туманида яшовчи фуқародан 18 миллион сўмга қалбаки 28 миллион сўм сотиб олганини тан олган.

Қўлга олинган самарқандлик ўз навбатида, Бухоро шаҳрида яшовчи фуқародан ҳар бирининг номинал қиймати 200 минг сўмдан бўлган қалбаки пулларни 60 минг сўмдан сотиб олганини маълум қилган.

Бундан ташқари, Бухоро шаҳрида яшовчи уч нафар фуқаро 100 миллион сўм қалбаки пулни 30 миллион сўмга сотмоқчи бўлган вақтида қўлга олинган. Улардан 336,4 миллион сўм қалбаки пул, тўртта компьютер, бешта принтер, учта қоғоз кесиш машинаси ва 35 дона рангсиз лак мусодара қилинган.

Эслатиб ўтамиз, аввалроқ Ўзбекистонда янги 1000 сўмлик тангалар муомалага чиқарилиши, Ўзбекистонда қарийб 9 минг доллар қалбаки пуллар муомалага чиқарилишининг олди олингани, Марказий банк раиси 200 минг сўмлик банкноталар чиқарилиши мумкинлигини айтгани ҳамда Ўзбекистонда 7 ойда қанча қалбаки валюталарнинг муомалага киртилишига чек қўйилгани ҳақида хабар берилганди.