Энергетика вазири Жўрабек Мирзамаҳмудов ва «Ўзбекнефтгаз» раиси Меҳриддин Абдуллаев журналист ҳамда блогерлар билан учрашувда Ўзбекистон нефть ва газ конларига тегишли эксклюзив барча ҳуқуқлар Россияга берилгани айтилган саволларга жавоб берди.

Аввалроқ «Озодлик радиоси» Ўзбекистондаги барча нефть ва газ конларининг эксклюзив ҳуқуқлари Россияга бериб юборилганига оид суриштирувини эълон қилганди. Бу жамоатчиликнинг кўплаб норозиликларига сабаб бўлди. Ўзбекистон энергетика вазирининг сўзларига кўра, суриштирувда келтирилган маълумотлар асоссиз.

«Йўқ, бермаган. Умуман асоссиз, бу ёлғон, нотўғри талқин қилинган маълумот. Ўзимизда эксплуатацияда бўлган барча конларнинг асосий қисми ‘Ўзбекнефтгазʼ компаниясида», —дейди вазир.

Шу билан бирга, Жўрабек Мирзамаҳмудов ушбу 35 йиллик ҳуқуқлар нимага тегишли эканига ҳам изоҳ берган.

«Бу Сурхондарё вилоятининг Бойсун тумани ҳудудида жойлашган 35 йил фақатгина ‘Мустақилликнинг 25 йиллигиʼ номли газ конденсат конини ўзлаштиришга, уни ишлатишга тегишли. Агарда Ўзбекистонда ҳозирда 250 дан ортиқ нефть ва газ конлари бўлса, шу конлардан 1 тасидир. Ҳозирги кунда инвесторлар томонидан тўлиқ ўзларининг ҳисобидан — бюджетдан харажат ёки давлат кафолати йўқ — юз фоиз инвесторлар ҳисобидан амалий ишлар олиб бориляпти», — дейди Мирзамаҳмудов.

Вазирнинг айтишича, кондан олинган фойдани инвестор ва давлат ўзаро 50/50 нисбатда тақсимлашга келишган. Битим кучга кирганидан бошлаб 35 йил давомида амал қилади.

«Нимага 35 йил деган савол туғилиши мумкин. Биздаги маҳсулотни тақсимлаш битимларидан 5 тасининг муддати 25 йилдан 42 йилгача. Масалан, Қандимдаги кон бўйича ‘Лукойл’ билан битим муддати — 42 йил, сабаби бунинг 8 йили геологик қидирув ишларини ўз ичига олади. ‘Мустақилликнинг 25 йиллиги’ кони бўйича шартнома 35 йилга тузилган, шундан 8 йили — геологик қидирув ишлари», — дейди у.

Эслатиб ўтамиз, январь охирларида Ўзбекистон ҳамда Россиянинг «Газпром» компанияси газ соҳасида ўзаро ҳамкорлик юзасидан «йўл харитаси»ни имзолаганди. Ижтимоий тармоқларда энергетика тизими мустақиллигига таҳдид дея қаралаётган «газ иттифоқи» лойиҳаси томон қадам сифатида талқин қилинган. Ўз навбатида «Юксалиш» умуммиллий ҳаракати раиси Энергетика вазирлиги мазкур «йўл харитаси»нинг умумий мазмуни ҳақида жамоатчиликка хабар бериши лозимлигини таъкидлаган эди.