Ўзбекистон энергетика вазири Жўрабек Мирзамаҳмудов Россиянинг «Лукойл» компанияси мисолида маҳсулот тақсимоти битими (СРП) қандай ишлашини тушунтириб берди ҳамда шартнома шартларини очиқлади.

Вазирнинг тушунтиришича, кўпчилик ушбу шартномани 90/10 деб номлайди. Яъни кўплаб инсонлар ушбу кондаги газнинг 90 фоизи «Лукойл»га, 10 фоизи Ўзбекистонга деган хато тасаввурга эга. Аслида эса бутунлай бошқача. Инвесторлар қаторида бор бўлган «Ўзбекнефтгаз» (давлат корхонаси) улушини қўшиб ҳисоблаганда, жами даромаднинг 55 фоизи Ўзбекистон, 45 фоизи эса «Лукойл»га тегади.

«Масалан, 100 млн доллар даромад бўлди, дейлик. Дастлаб даромад 50/50 бўлинади: Ўзбекистонга 50 миллион доллар, инвесторларга 50 миллионн доллар. Кейин инвесторлар шу 50 миллион долларни яна ўзлари иккига бўлишади. Инвестор эса 2 та: бири «Лукойл» — унинг улуши 90 фоиз, демак 45 миллион доллар (50 миллион долларнинг 90 фоизи). Иккинчиси «Ўзбекнефтгаз» — унинг улуши 10 фоиз, демак 5 миллион доллар (50 миллион долларнинг 10 фоизи). Шундай қилиб, 100 миллион доллар мисолида олсак, ушбу битим доирасида Ўзбекистон томонига 55 миллион доллар, «Лукойл»га 45 миллион доллар тегмоқда», — дейди вазир.

Вазир билан мулоқотида иштирок этган журналистлар Жўрабек Мирзамаҳмудовга бу маълумотлар шу пайтгача яшириб келингани хато бўлганини айтган.

«Ҳақиқатан ҳам балки бу бизнинг айбимиздир. Ўйлайманки, биз энди таклиф билан чиқамиз: умуман, ‘СРП’нинг ишлаш механизмини тушунтирамиз. Матбуот котиби бунақа деталларни билмайди», – дейди Ўзбекистон энергетика вазири.

Аввалроқ Энергетика вазири Жўрабек Мирзамаҳмудов ва «Ўзбекнефтгаз» раиси Меҳриддин Абдуллаев журналист ҳамда блогерлар билан учрашувда «Озодлик радиоси» томонидан эълон қилинган суриштирувга кўра, Ўзбекистондаги барча нефть ва газ конларининг эксклюзив ҳуқуқлари Россияга бериб юборилганини асоссиз маълумотлар деб атаганди.