Россия ҳукумати сўнгги йилларда президент Владимир Путиннинг қароргоҳларига элтувчи темир йўл тармоқларини, шунингдек, бир нечта махфий станциялар қурди, деб хабар беради «Проект».

Путиннинг Новгород вилоятидаги Валдай қароргоҳи яқинида вертолёт майдончасига эга қўриқланадиган термир йўл станцияси мавжуд. «Проект» журналисти уни 2022 йил кузида Валдай миллий боғи ҳудудида эканини аниқлаган. Сунъий йўлдошдан олинган суратга кўра, Путин учун мўлжалланган станция ва темир йўл 2019 йилда қурилган. Уч нафар маҳаллий аҳолининг айтишича, улардан фақат президентнинг ҳаракатланиши учун қўлланилади.

Путиннинг Москва вилояти Ново-Огарёвадаги қароргоҳида жойлашган темир йўл станцияси 2015 йилда қурилган — бунга ҳам сунъий йўлдошлардан олинган суратлар исбот бўла олади. Станция қароргоҳдан 400 метр узоқликда жойлашган. Станция қурилган ер Дмитрий Медведев ҳукумат раҳбари бўлган вақтда унинг қарори билан хусусий мулкдан тортиб олинган. Станция баланд панжаралар билан ўралган.

2017 йилда эса Сочидаги «Бочаров ручей» президент қароргоҳи яқинида термир йўл платформаси қурилгани ва ушбу йўлнинг охири берклиги, электричка ҳаракатланадиган йўл панжаралар билан тўсилгани маълум бўлганди.

Аввалроқ «Досье» суриштирув маркази томонидан эълон қилинган хабарда 2021 йил иккинчи ярмида Россия президенти зиҳрли поездда ҳаракатланишни бошлагани келтирилганди. Sota нашрининг таъкидлашича, президент зирҳли поезди Москвада Комсомол майдони яқинидаги махсус вокзалдан фойдаланади. «Россия темир йўллари» собиқ машинистининг айтишича, зирҳли поезд Москва—Каланчёвская станцияси депосида туради. У ерда юқори мартабали амалдорлар учун мўлжалланган ёпиқ вокзал мавжуд.