Сурхондарё вилояти Термиз шаҳрида ноқонуний гиёҳванд моддалар савдоси билан шуғулланган шахсларга суд ҳукми ўқилди, деб хабар беради ДХХ.

Қайд этилишича, Термиз туманида яшовчи 34 ёшли эркак 2021 йил сентябрь ойида Денов туманида тожикистонлик шахсдан 2 килограмм опий моддасини 14 минг долларга сотиб олади ва келгусида уни қайта сотиб, даромад топиш мақсадида уйида сақлаган.

2022 йил июнь ойида у Термиз шаҳри ва Термиз туманида яшовчи (1983 ва 1986 йилларда туғилган) икки нафар таниши билан ушбу оғуни 40 минг долларга сотган вақтида ДХХ ходимлари томонидан қўлга олинган.

Шунингдек, ҳолат юзасидан қўзғатилган жиноят иши доирасида Термиз шаҳрида яшовчи 38 ёшли шахс ҳам мазкур ноқонуний ишга аралашгани аниқланган.

Жиноят ишлари бўйича Термиз шаҳар судининг ҳукмига кўра, ушбу 4 нафар шахсга нисбатан Жиноят кодексининг 246 (контрабанда) ва 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан айбдор деб топилиб, 12 йилдан 14 йилгача бўлган муддатларга озодликдан маҳрум этиш жазоси тайинланган.

Аввалроқ ДХХ кучли таъсир қилувчи дори воситаларининг ноқонуний савдосига чек қўйгани, Самарқандда 5 килограммга яқин гиёҳванд моддалар айланмаси тўхтатиб қолингани тўғрисида хабар берилганди. Шунингдек, Тошкентдаги мактабларда таркибида гиёҳванд моддалари бўлган маҳсулотлар тарқатилаётгани айтилганди.