Тошкент шаҳар ИИББ ижтимоий тармоқларда энаганинг ногирон болани ургани тарқалган видео юзасидан маълумот берди.

Ижтимоий тармоқларда аёл киши ёш болани ургани акс этган видео тарқалиб, турли муҳокамаларга сабаб бўлмоқда. Мазкур видеотасвир юзасидан пойтахт ИИББ томонидан текширув ўтказилган.

Аниқланишича, Чилонзор туманида истиқомат қилувчи 28 ёшли И.Х. ўзининг ногирон фарзандига энагалик қилиш учун 21 ёшли С.Т.ни ишга ёллаган. Бироқ энаганинг хизматидан шубҳаланган уй эгаси фарзандининг ётоқхонасига кузатув камераси ўрнатган.

11 февраль куни энага 6 ёшли К.З.га қўпол муносабатда бўлиб, уриб-калтаклагани акс этган ҳолат кузатув камерасида қайд этилган. Хонадон эгаси И.Х. шу куни С.Т.ни ишдан бўшатган ҳамда фуқароларни огоҳликка чақириш мақсадида видеотасвирни ижтимоий тармоқларда тарқатган.

Мазкур ҳолат юзасидан Чилонзор тумани ИИО ФМБ томонидан терговга қадар текширув ўтказилмоқда. «Текширув якуни бўйича қонуний қарор қабул қилиниши таъминланади», дейилади хабарда.

Аввалроқ бола ҳуқуқлари бўйича вакил Алия Юнусова Самарқандда фарзандини калтаклаган аёл иши юзасидан муносабат билдириб, аёлни оналик ҳуқуқидан маҳрум қилиш таклифини берганди. Сентябрь охирларида жиноят ишлари бўйича Пайариқ тумани суди биносида икки ёшли фарзандини калтаклаган аёлга ҳукм ўқилганди.