Тошкент шаҳрида ҳайвонларнинг хавфли вазиятда қолдирилиши оқибатида икки бош отнинг нобуд бўлиши ҳамда қолган отларнинг ҳолсизланишига сабаб бўлгани юзасидан Чилонзор тумани ҳуқуқбузарликлар профилактикаси бўлими ва Миллий гвардия томонидан текширув ўтказилди. Бу ҳақда Миллий гвардия матбуот хизмати хабар берди.

Қайд этилишича, якуний текширув натижаларига кўра, отларнинг ҳолсизланиши ва нобуд бўлишида айбдор бўлган шахслар — 1958 йилда туғилган С.А. ва 1958 йилда туғилган У.А.га нисбатан Маъмурий жавобгарлик тўғрисидаги кодекснинг 111-моддаси, 1-қисмида (ҳайвонларга нисбатан шавқатсиз муносабатда бўлиш) назарда тутилган ҳуқуқбузарлик бўйича баённомалар расмийлаштирилди ва уларнинг ҳар бирига 900 минг сўмдан жарима солинди.

Бундан ташқари, айни пайтда отчопар раҳбариятини алмаштириш масаласи ҳам кўриб чиқилмоқда.

Аввалроқ Сурхондарёдан топилган айиқ боласи реабилитация марказига ўтказилмаса, нобуд бўлиши мумкинлиги, Зарафшон дарёсида мингга яқин балиқ нобуд бўлгани аниқлангани ҳамда Бухородаги қўриқхонада ўрнатилган фотоқопқонга ноёб турдаги отлар тушиб қолгани ҳақида хабар берилганди.