Туркиядаги зилзилада ҳалок бўлгани айтилган ўзбекистонлик аёл тирик бўлиб чиқди — видео
Ўзбекистоннинг Истанбулдаги Бош консулхонаси олдинроқ ҳалок бўлган дея эълон қилинган аёл тирик ҳолда топилганини маълум қилди.
Ижтимоий тармоқларда номаълум шахслар томонидан яна бир Ўзбекистон фуқароси — 1975 йилда туғилган ва Наманган вилоятида доимий яшаб келган Шоҳиста Ниёзова зилзила оқибатида қулаган бино ичида вафот этгани тўғрисида хабар тарқатилган эди.
Қайд этилишича, мазкур хабар асосида Бош консулхона ушбу фуқарони қидириб топишга муваффақ бўлган ва у тирик. Консулхона томонидан Шоҳиста Ниёзова шифохонага олиб борилиб, кўрикдан ўтказилган.
«Унга зарурий тиббий муолажа кўрсатилган, ҳозирда унинг соғлиғи қониқарли аҳволда. Шоҳиста Ниёзовани қисқа муддатларда ватанимизга юбориш чораларини кўрмоқдамиз», дейилади хабарда.
Аввалроқ Туркияда содир бўлган зилзилалар оқибатида ҳалок бўлган ўзбекистонликлар сони тўрт кишига етгани тўғрисида хабар берилганди. 12 февраль куни зилзила оқибатида Шонлиурфа шаҳрида вафот этган яна бир Ўзбекистон фуқароси — 42 ёшли аёл М.Б.нинг жасади Истанбулдан Тошкентга юборилган.
Мавзуга доир: Ўзбекистонлик қутқарувчилар Туркияда вайроналар остидан 9 кишини қутқариб олди — видео
Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.
