«Чирчиқ» технопаркида кимёга чидамли маҳсулотлар ишлаб чиқариш йўлга қўйилди — видео
«Чирчиқ» технопарки резиденти Himplast Corp 2022 йил декабрда ишлаб чиқаришни йўлга қўйган эди. Компания ностандарт кимёвий барқарор маҳсулотлар — идишлар, газ қувурлари, термопластик ва композит материаллардан ванналар ишлаб чиқаради. Бу иккита шу каби технологияни ўзида бирлаштирган Ўзбекистондаги ягона корхонадир.
Қайд этилишича, бу ерда ишлаб чиқарилган маҳсулотлар агрессив суюқликларни сақлаш ва шу каби газларни ташишга мўлжалланган. Himplast Corp’нинг асосий истеъмолчилари — «Ўзкимёсаноат» тизимидаги корхоналар ҳисобланади: «Навоийазот» АЖ, «Махам-Чирчиқ» АЖ, «Фарғонаазот» АЖ, «Аммофос-Максам» АЖ, «Деҳқонобод калий заводи» АЖ, «Қўнғирод сода заводи» МЧЖ ҚК, «Биринчи резинотехника заводи» МЧЖ.
Бундан ташқари, компания ОТМК ва металлургия заводларига ҳам маҳсулот етказиб беради. Шу билан бирга, ишлаб чиқарувчи ҳозирда қўшни давлатлар бозорига чиқиш ниятида. Тўғридан-тўғри инвестициялар ҳажми 3 миллион доллардан ортиқни ташкил этади. Иш ўринлари сони — 80 та.
Компания «Чирчиқ» технопаркидаги ишлаб чиқариш қувватини йилига 1000 тоннагача етказишни режалаштирмоқда.
