«Саноат энергетика гуруҳи» компанияси ижтимоий тармоқларда Ўзбекистон энергетика тизими тўғрисида тарқалаётган хабарларга расмий муносабат билдирди.

«Ўзбекистондаги барча газ ва нефть конлари давлат мулки бўлган ва шундай бўлиб қолади», дейилади муносабатда. «Саноат энергетика гуруҳи» (Saneg) эса тегишли лицензиялар асосида ишлаб чиқариш фаолиятини амалга оширади. Компания Ўзбекистонда нефть қазиб олишни кўпайтириш дастури доирасида иш олиб боради.

Қайд этилишича, бугунги кунда Saneg’да 10 мингдан ортиқ Ўзбекистон фуқороcи ишламоқда, шунингдек, 200 га яқин юқори малакали хорижий мутахассислар жалб этилган. 2020–2002 йилларда нефть қазиб олишни кўпайтириш дастури доирасида компания 540 миллион доллардан ортиқ сармоя киритган. Бунинг натижасида суюқлик ишлаб чиқариш ҳажмини 42 фоизга ошириш борасида ишларни амалга оширмоқда.

Нефть ва газ конденсати бутун ҳажми Фарғона нефтни қайта ишлаш заводида қайта ишланади ва кейинчалик ички бозорга етказиб берилади.

Ўзбекистон Президентининг 2021 йил 11 февралдаги ПФ-6167-сон қарорига асосан модернизацияга муҳтож бўлган Фарғона нефтни қайта ишлаш заводи аукционга қўйилган. Аукцион Давлат активларини бошқариш агентлиги Нидерландиянинг KPMG халқаро компаниясини жалб қилган ҳолда амалга оширилган. Битимга ҳуқуқий ёрдам Dentons (АҚШ) томонидан берилган.

Танловда 3 нафар аризачи иштирок этган бўлиб, натижада ушбу корхонадаги давлат улушини «Саноат энергетика гуруҳи» қўлга киритган ва у янада қулайроқ шартларни таклиф қилган. Корхонани модернизация қилиш дастури ишлаб чиқилган бўлиб, унда иш ўринларини сақлаб қолиш, ишлаб чиқаришни модернизация қилиш, рақамлаштириш, ўз маҳсулотларини қайта ишлаш ҳажмини ошириш, ижтимоий масъулият чоралари кўрилган. Дастурнинг умумий қиймати 400 миллион долларни ташкил этади. Дастурни молиялаштиришда давлат иштироки таъминланмаган. 2021–2022 йилларда ишлаб чиқаришни модернизация қилишга 156 миллион доллар сармоя киритилган ва ҳозирда бу борадаги ишлар давом этмоқда.

Шунингек, Saneg компанияси «Қоракўл» эркин иқтисодий зонасида замонавий газ-кимё кластерини яратишда ҳам инвестор сифатида иштирок этмоқда. Ушбу лойиҳа фақат компаниянинг ўз маблағлари ҳамда жалб қилинган бозор кредитлари ва инвестициялар ҳисобидан амалга оширилади. Давлат маблағлари ишлатилмайди. Айни пайтда инвестор томонидан қарийб 390 миллион доллар сармоя киритилиб, қўшимча 2600 иш ўрни яратилади. Бюджетга ажратмаларнинг прогноз кўрсаткичи 2026 йилдан бошлаб йилига 570 миллион долларни ташкил этади.

«Саноат энергетика гуруҳи» МЧЖ ўз фаолиятини Ўзбекистон қонунчилигига мувофиқ очиқ, ошкора олиб боради. Корхона жамоаси яқин келажакда суюқ углеводородлар ишлаб чиқаришни сезиларли даражада ошириш ва корхона олдига қўйилган барча вазифаларни бажариш учун барча саъй-ҳаракатларни амалга оширмоқда.

«Компания халқ фаровонлиги йўлида соҳани ривожлантириш, Ўзбекистон ёшларини касб-ҳунарга ўргатиш, ўз ходимлари ва уларнинг оила аъзоларини қўллаб-қувватлашда давом этади», дейилади муносабатда.

Аввалроқ энергетика вазири Жўрабек Мирзамаҳмудов ва «Ўзбекнефтгаз» раиси Меҳриддин Абдуллаев журналист ҳамда блогерлар билан учрашувда «Озодлик радиоси» томонидан эълон қилинган суриштирувга кўра, Ўзбекистондаги барча нефть ва газ конларининг эксклюзив ҳуқуқлари Россияга бериб юборилганини асоссиз маълумотлар деб атаганди.

Эслатиб ўтамиз, январь охирларида Ўзбекистон ҳамда Россиянинг «Газпром» компанияси газ соҳасида ўзаро ҳамкорлик юзасидан «йўл харитаси»ни имзолаганди. Ижтимоий тармоқларда энергетика тизими мустақиллигига таҳдид дея қаралаётган «газ иттифоқи» лойиҳаси томон қадам сифатида талқин қилинган. Ўз навбатида «Юксалиш» умуммиллий ҳаракати раиси Энергетика вазирлиги мазкур «йўл харитаси»нинг умумий мазмуни ҳақида жамоатчиликка хабар бериши лозимлигини таъкидлаган эди.