Қашқадарёда қалбаки 5 минг долларни муомалага киритаётган шахс ушланди
Қашқадарёда қалбаки 5 минг АҚШ долларини 25 миллион сўмга сотмоқчи бўлган шахслар ушланди, дея хабар берди Давлат хавфсизлик хизмати.
ДХХнинг Қашқадарё вилояти бўйича бошқармаси ходимлари томонидан Иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказилган тезкор тадбирда Муборак туманида яшовчи, 1952 йилда туғилган, муқаддам судланган Ш.Э. қалбаки 5 минг АҚШ долларини 25 миллион сўмга сотаётган вақтида ашёвий далиллар билан ушланди.
Аниқланишича, тезкор суриштирув ҳаракатлари давом эттирилиб, Ш.Э. мазкур қалбаки купюраларни Китоб туманида яшовчи, 1964 йилда туғилган муқаддам бир неча маротаба судланган Т.Х.дан олгани аниқланиб, у ҳам ушланган.
Маълум бўлишича, ушбу қалбаки хорижий валюталар Қозоғистондан олиб келинган. Ҳозирда ушбу ҳолат юзасидан мазкур шахсларга нисбатан Жиноят кодексининг тегишли моддалари билан жиноят иши қўзғатилган.
Аввалроқ Жиззах, Самарқанд ва Бухорода 460 миллион сўмдан ортиқ қалбаки пуллар мусодара қилингани, Ўзбекистонда қарийб 9 минг доллар қалбаки пуллар муомалага чиқарилишининг олди олингани ҳамда Наманганда салкам 11 минг доллар қалбаки пулни муомалага чиқармоқчи бўлганлар ушлангани ҳақида хабар берилганди.
