Қирғизистон собиқ президенти Алмазбек Атамбаев жазони ижро этиш муассасасидан озод қилинди. Бу ҳақда унинг оиласига таяниб «ТАСС» хабар берди.

Қайд этилишича, 14 февраль куни Олий суд коллегияси ёпиқ мажлисда Атамбаев ишини қайта кўриб чиқишга юбориш бўйича қарор қабул қилган. Собиқ президентнинг адвокатлари ишни янги очилган ҳолатлар туфайли қайта кўриб чиқишни сўраган.

Ўз навбатида Бишкек шаҳрининг Первомайс туман суди Атамбаевга даволаниш учун Қирғизистондан ташқарига чиқишга рухсат берган. «Социал-демократлар» партияси раиси Темирлан Султанбековнинг айтишича, сўнгги йилларда 66 ёшли Атамбаевнинг саломатлигига «жиддий зарар» етказилган: у иккита операция ва ундан кейинги реабилитацияга муҳтож.

Алмазбек Атамбаев 2011 йилдан 2017 йилга қадар Қирғизистон президенти лавозимида фаолият юритган. 2019 йилда у ноқонуний бойиш ва коррупцияда айбланиб, дахлсизлик ҳуқуқидан маҳрум этилганди. Собиқ президентни қўлга олиш учун ҳуқуқ-тартибот органлари ходимлари Атамбаевнинг Қўй-Тошдаги қароргоҳига штурм уюштиришга мажбур бўлган — унинг тарафдорлари эса қаршилик кўрсатганди. 2021 йил ёзида эса у Туркия фуқароларига ноқонуний паспорт бериш, шунингдек, 2020 йил октябрь ойида оммавий тартибсизликлар уюштиришда айбланган.

Атамбаевга нисбатан бир неча жиноят иши қўзғатилган. Унинг шериги Темирлан Султанбековнинг таъкидлашича, охир-оқибат собиқ президент барча айбловлар бўйича оқланган.

2020 йил июнда Бишкек суди Атамбаевни «қонундаги ўғри» Азиз Батукаевнинг қамоқдан қонуний озод этилишига оид коррупция ишида айбдор деб топган. Собиқ президент 11 йилга колонияга ҳукм этилган. Атамбаевга нисбатан суд ҳукмини бир неча бор ўзгартиришга ҳаракатлар бўлган. 2022 йил мартда Олий суд уни ўз кучида қолдирган, аммо ҳозирда ҳукм бекор қилинган ва иш қайта кўриб чиқилмоқда.