Тошкент вилоятида турмуш ўртоғи Россияга ишлагани кетган аёл икки нафар фарзандининг кўз ўнгида 4 нафар маҳалладоши томонидан зўрлангани айтилган хабарлар ижтимоий тармоқларда тарқалди.

Маълум қилинишича, 4 нафар эркакдан бири муқаддам судланган бўлган. Улар аёлнинг уйига бостириб кириб, уни калтаклаган ҳамда зўрлаган, шунингдек, ушбу ишларнинг гувоҳи бўлган аёлнинг фарзандларига ҳам босим ўтказгани айтилмоқда.

Бундан ташқари, хабарда айтилишича, ушбу воқеа бўйича очилган иш терговга оширилганидан кейин аёлни зўрлагани айтилаётган 4 нафар эркакнинг тўдабошисининг ота-онаси жабрланувчининг олдига келиб, ундан ушбу ишларни «босди-босди» қилишни сўраган.

Қайд этилишича, ҳозирда аёлнинг эри Россиядан қайтиб келган, турмуш ўртоғи эса реабилитация марказида. Катта фарзанди ушбу воқеалардан кейин стресс ҳолатида бўлгани сабабли, у билан психологлар шуғулланаётгани айтилган.

Ҳозирда ушбу ҳолат юзасидан Бош прокуратура томонидан ўрганиш ишлари олиб борилмоқда. Маълум қилинишича, мазкур воқеанинг натижалари ҳақида батафсил маълумот берилади.

Аввалроқ Қашқадарёда севгилиси томонидан зўрлангани айтилган 18 ёшли қиз жонига қасд қилгани ҳамда Қашқадарёда 8 ойлик ҳомиласи бор 15 ёшли қизни 4 йигит зўрлагани айтилаётгани ҳақида хабар берилганди.