Туркияда юз берган зилзилалар оқибатида ҳалок бўлганлар сони 31 974 кишига етди. Бу ҳақда Фавқулодда вазиятлар оқибатларини бартараф этиш бошқармаси (AFAD)га таяниб, Anadolu агентлиги хабар берди.

Маълумотларга кўра, Қаҳрамонмарашдаги иккита кучли зилзиладан кейин 3170 та афтершок қайд этилган.

Ҳозирга қадар Туркиянинг 10 та вилоятидан 195 962 киши эвакуация қилинган. Ҳалокат жойидаги қидирув-қутқарув ишларига Туркиянинг ўзидан 35 минг, хориж давлатларидан эса қарийб 9,5 минг қутқарувчи жалб этилган.

AFAD дала ходимлари, полиция, жандармерия, Миллий мудофаа вазирлиги, Миллий тиббий қутқарув гуруҳи (UMKE), тез ёрдам бригадалари, кўнгиллилар, маҳаллий хавфсизлик кучлари ва қўллаб-қувватлаш гуруҳларини ўз ичига олган ҳолда, офат оқибатларини бартараф этишда қатнашаётган ходимлар сони 249 089 кишини ташкил этмоқда.

Табиий офат юз берган ҳудудларга халқаро ёрдамларни мувофиқлаштириш учун 13 та элчи ва Ташқи ишлар вазирлигининг 17 ходими жўнатилган.

Аввалроқ Туркияда содир бўлган зилзилалар оқибатида ҳалок бўлган ўзбекистонликлар сони тўрт кишига етгани тўғрисида хабар берилганди. 12 февраль куни зилзила оқибатида Шонлиурфа шаҳрида вафот этган яна бир Ўзбекистон фуқароси — 42 ёшли аёл М.Б.нинг жасади Истанбулдан Тошкентга юборилган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.