Қирғизистоннинг жазони ижро этиш муассасасидан озод қилинган собиқ президенти Алмазбек Атамбаев ўзбек—қирғиз чегара масаласи ҳал қилинганини тарихий воқеа деб атади ҳамда ушбу шартномада Шавкат Мирзиёевнинг ролини юқори баҳолади. Бу ҳақда «АКИpress» хабар берди.

Қирғизистоннинг собиқ давлат раҳбари Алмазбек Атамбаев қамоқдан озод қилингандан кейин журналистлар учун ташкил этилган матбуот анжуманида Ўзбекистон—Қирғизстон ўртасидаги чегара масаласи ҳақида гапириб ўтди.

«Ўзбекистон билан чегара масаласини ҳал қилишга биринчи навбатда тўғри истак ва хоҳишлар туртки бўлган. Аслида, бу  ҳозирги кунда Тожикистон билан муносабатларимизни ҳисобга олганда жуда катта олдинга силжиш, хурсандман бундан», — дейди у.

Атамбаевнинг сўзларига кўра, чегара масаласида, хусусан, Кампир-Обод сув омбори бўйича келишувга норозилик билдирган жамоатчилик вакилларини ҳибсга олмасдан, уларга ишончли далиллар келтириш керак эди. Шунингдек, иккала давлат ўртасида чегара масаласини ҳал қилишда Шавкат Мирзиёевнинг ҳиссаси катта эканини айтиб ўтди.

«Бу тарихий қарор. Яхшиямки бизнинг қўшниларимизда Мирзиёев президент, Каримов эмас. Шавкат Мирзиёевнинг Қирғизистонга ва унинг халқига муносабатини биламан. Буни қадрлаш керак», — деган собиқ президент.

Аввалроқ Қирғизистон аҳолиси Кампир-Обод сув омборининг Ўзбекистонга бериб юборилишида ўз ҳукуматини айблагани ҳақида хабар берилганди. Шунингдек, Шавкат Мирзиёев Қирғизистон билан чегара ва Андижон сув омборига оид қонунларни имзолаганди. Унга кўра, Ўзбекистонга 4957 гектардаги Кампир-Обод сув омбори ҳудуди ҳамда тўғонга хизмат кўрсатиш ва уни муҳофаза қилиш учун қўшимча 19,5 гектар ер майдони ўтказилади, Қирғизистонга эса компенсация тарзида 1019 гектар яйлов ерлари берилиши маълум бўлганди.