Агарда Украина Қримни қайтариб олишга уринса, бу Россия учун қизил чизиққа айланади, шу сабабдан АҚШ Москванинг «кенг кўламли жавоби»ни юзага келтирмаслик учун украин Қуролли Кучларининг бундай операцияни бошлашини рағбатлантирмайди. Бу ҳақда АҚШ давлат котиби Энтони Блинкен Zoom орқали бир қатор экспертлар билан ўтказилган мулоқотда маълум қилди, деб ёзади Politico.

Нашр манбаларининг айтишича, Блинкен АҚШ Украинанинг ҳозирги шароитда Қримни қайтариб олиш режаларини ақлли қарор деб ҳисобламаслигини билдирган. Газета субҳатдошларининг сўзларига кўра, давлат котиби бу гапни тўғридан-тўғри айтмаган, бироқ унинг гапларидан шу каби маънони чиқариш мумкин.

Politico’нинг бошқа икки манбаси АҚШ давлат котибининг гап-сўзларида бундай маънони кўрмаган. Суҳбат давомида у мамлакат Қуролли Кучлари қаерга зарба бериши — Украинанинг иши эканини айтган, бу орқали у Вашингтон Киевнинг Қримга ҳужумини очиқ қабул қилишини тушуниш мумкин.

«Умуман олганда воқеалар ривожи қандай давом этиши борасида катта ноаниқликлар мавжуд», — дейди нашр суҳбатдоши.

Пентагоннинг ҳисоблашича, Украина армиясида ҳозирча Қримни қайтариб олиш имконияти йўқ. Идора вакиллари ҳарбийларнинг позицияси ҳақида конгрессменлар учун ўтказилган махфий брифингда маълум қилган.

Зеленский ҳукумати Украина ҳарбий йўл билан 1991 йилги чегараларни қайтариб олишига Пентагон шубҳага бораётганидан «дарғазаб бўлганди». Киевнинг таъкидлашича, Америка разведкаси Украина Қуролли Кучларининг имкониятлари борасида олдин ҳам хато қилган. АҚШ Штаб бошлиқлари бирлашган қўмитаси раиси генерал Марк Милли январь охирида шу каби баҳони берганди. У 2023 йилда Украина армиясига 1991 йилги чегараларга қайтиш «ҳарбий йўл билан жуда ва жуда қийин эканини» маълум қилган.

Қрим 2014 йилда референдум натижалари бўйича Россия таркибига қўшилганди. Украина ҳукумати ва Ғарб давлатлари ушбу овоз бериш жараёнларини тан олмаган ва содир бўлаган воқеани аннексия деб ҳисоблаган. Россия президенти Владимир Путин яриморол аҳолиси ўз танловини амалга оширган ва Қримнинг тарихан қаерга тегишли экани тўғрисидаги масала ёпилганини маълум қилганди.