Украина жанговар ҳаракатларда «жуда катта миқдорда ўқ-дорилардан» фойдаланмоқда. Буюк Британия украин ҳарбийларини ўқитиш давомида уларга НАТОга аъзо давлатларнинг армиялари каби снарядларни тежашни ўргатишга уринмоқда. Бу ҳақда Британия мудофаа вазири Бен Уоллес Times Radio’га берган интервьюсида маълум қилди.

«Жанг олиб боришнинг рус ёки совет усули оғир снарядларни артиллерия қуроллари орқали ёғдиришдан иборат. Биз Ғарбда ва НАТО ҳеч қачон бундай усулда жанг олиб бормаймиз. Биз уларни Ғарб намунаси бўйича жанг қилишга ўргатяпмиз», —дейди Уоллес.

Украина ҳукумати ҳам жанговар ўқ-дорилар жуда кўп сарфланаётганини айтган ва буни жанглар интенсивлиги билан боғлаган эди — Украина президенти офисига кўра, февралда снарядлар деярли қолмаган. Мамлакат Қуролли Кучлари ҳар куни 5–6 минг снарядлардан фойдаланмоқда — бу кичикроқ Европа давлати бир йил давомида ишлаб чиқарадиган миқдорга тенг.

Украинага снарядлар етказиб беришда АҚШ ҳам қийинчиликка учрамоқда, гап биринчи навбатда 155 миллиметрли артиллерия қуроллари ва Stinger зенит мажмуалари ҳақида кетмоқда. АҚШ Украинага ўз қуролланишидаги ортиқча нарсаларни, яъни Америка армияси захирасида бўлмаган қуролларни етказиб бермоқда. Пентагон яқин икки йил ичида снарядлар ишлаб чиқаришни 500 фоизга ошириш ниятида.

Ўз навбатида Россия ҳукумати Ғарб томонидан Украинага қуроллар етказиб берилишини танқид қилмоқда.

Январда АҚШ ҳукумати Украинага 2,2 миллиард долларлик янги ҳарбий ёрдам пакетини тайёрлаётгани маълум бўлганди. Унинг ичидан узоқ масофага мўлжалланган ракеталар ўрин олади. Гап Boeing ва Saab Group компаниялари томонидан ишлаб чиқарилган GLSDB (Ground Launched Small Diameter Bomb) ракеталари ҳақида кетмоқда. Улар 150 километр узоқликка парвоз қила олади. Украина узоқ масофага мўлжалланган ракеталарга муҳтож ва Ғарб ҳамкорларига бундай қуроллар мамлакат ташқарисидаги нишонларга қарши қўлланилмаслигига кафолат беришга тайёрлигини билдирган.