Энергетика вазирининг собиқ ўринбосари ушбу вазирликда ишлаётгани маълум бўлди
Аввалроқ қиш мавсумида аҳолини энергия ресурслари билан узлуксиз таъминлаш бўйича кўрилаётган чоралар юзасидан ўтказилган йиғилишда вазиятга олдиндан баҳо бериб, қиш мавсумига лозим даражада тайёргарлик кўрмагани учун Шавкат Мирзиёев томонидан энергетика вазири ўринбосари Шерзод Хўжаев лавозимидан озод этилгани ҳақида хабар берилганди.
Энергетика вазирлиги матбуот хизматига таяниб Газета.uz’нинг хабар беришича, энергетика вазирининг собиқ ўринбосари Шерзод Хўжаев ушбу вазирликда ҳали ҳам ишлаётгани маълум бўлди. Таъкидланишича, ҳозирда у ташкилотнинг қайта тикланувчи энергия манбалари бўйича лойиҳа офиси директори лавозимида ўз фаолиятини давом эттирмоқда.
Аввалроқ энергетика вазирининг собиқ ўринбосари Шерзод Хўжаев АЭС қурилишида нега айнан Россия билан ҳамкорлик қилинаётганини тушунтирганди, шунингдек, у иқлим ўзгаришлари Ўзбекистон энергетикаси учун катта чақириқ бўлиши ҳақида айтиб ўтганди.
