Жаҳон банки Туркияга 1,78 миллиард доллар ажратишини маълум қилди, деб хабар беради Anadolu агентлиги.

«Табиий офат оқибатида етказилган зарар кўламини тезкор баҳолаш ва қайта тиклаш ҳамда реконструкция қилишда устуворлик бериладиган вилоятларни аниқлаш ишлари бошланган», дейилади банк баёнотида.

Қайд этилишича, 1,78 миллиард доллар ҳалокатли зилзилалар ҳамда ундан кейинги афтершоклар оқибатида вайрон бўлган ҳудудларни қайта тиклаш ва қутқарув ишларини ўтказишга ажратилади.

Жаҳон банки раҳбари Дэвид Малпасснинг маълум қилишича, офат кўламини баҳолаш ва табиий офат хавфини бошқариш бўйича бой халқаро тажрибага таянган ҳолда, банк қайта тиклашни қўллаб-қувватлаш соҳаларига устувор аҳамият бериш учун зарарни тезкор баҳолашни йўлга қўяди.

Туркияда 6 февраль тонгида юз берган зилзилалар оқибатида 35 мингдан ортиқ инсон ҳалок бўлган, қарийб 200 минг киши жароҳат олган. Видеоёзувлардан кўриш мумкинки, кўплаб бинолар ер ости силкинишлари бошланиши билан қулаб тушган. Туркия Адлия вазирлиги ушбу уйларни қуришда йўл қўйилган камчиликларни аниқлаш бўйича тергов бюросини ташкил этди. Вазирлик биноларнинг қулашига алоқадор бўлган барча пудратчи ва бошқа масъул шахсларни аниқлашни талаб қилган.

Тергов давомида бир неча киши ҳибсга олинган. 11 февраль куни Истанбул аэропортида Меҳмет Яшар Кошкун ушланганди — у зилзила вақтида бутунлай қулаб тушган 12 қаватли турар жой биносининг қурилиши билан шуғулланган пудратчидир. Anadolu агентлиги маълумотларига кўра, у Черногорияга учиб кетмоқчи бўлган. Мазкур аэропортда 12 февраль куни Явуз Каракуш исмли яна бир пудратчи рафиқаси билан қўлга олинган, улар Грузияга учмоқчи бўлган.

Аввалроқ Шавкат Мирзиёевнинг топшириғига биноан Ўзбекистон махсус борти ҳалокатли зилзилалар натижасида жабрланганларга шошилинч ёрдам кўрсатиш мақсадида Газиантеп шаҳрига (Туркия) етиб боргани тўғрисида хабар берилганди.