Александр Лукашенко журналистлар билан мулоқот давомида Беларуснинг Украина ҳудудидаги ҳарбий операцияда иштирок этиш шарти ҳақида гапирди, деб хабар беради «БелТА».

«Мен руслар билан Беларусь ҳудудидан туриб ҳозирча фақат битта ҳолатда жанг қилишга тайёрман: у тарафдан ҳеч бўлмаса, битта аскар менинг одамларимни ўлдириш учун Беларусь ҳудудига ўтсагина. Агарда улар Беларусга нисбатан тажовуз қилса, жавоб қаттиқ бўлади», — дейди у.

Шу билан бирга, Беларусь етакчиси тинчлик музокараларини ўтказишга чақирган. «Украинада тинчлик бўлишини истайсизларми — келинглар, эртадан бошлаб тинчлик ҳақида гапиришни бошлаймиз. Замбараклар ҳам ўт очишни тўхтатади», — дея таъкидлайди Лукашенко.

Лукашенко бир неча бор Минск Украинага қарши ҳарбий ҳаракатларда иштирок этиш ниятида эмаслигини билдирган. 2022 йил майида у бу борада «зарурат йўқлигини» айтган, аммо 4 октябрда Беларусь ҳарбий операцияда билвосита бўлса-да иштирок этаётганини тан олган. Унинг сўзларига кўра, Минскнинг мақсади қуролли тўқнашувнинг Беларусда тарқалишига йўл қўймаслик.

Аввалроқ Лукашенко Украинадаги урушни тугатиш шартини айтганди. Шунингдек, у дунёдаги янги «қурол» номини маълум қилганди. Бундан ташқари, Лукашенко Россияни ядро қуролидан фойдаланишга тайёр бўлишга чақирган. Декабрь охирларида Лукашенко чегарадаги кескинликни зудлик билан камайтириш кучларини нима сабабдан текшириш бошланганини тушунтирганди.

Эслатиб ўтамиз, июль ойида Лукашенко AFP нашрига берган интервьюсида мамлакат Россиянинг Украинага бостириб киришини қандай қўллаб-қувватлашини тушунтирганди. Унинг сўзларига кўра, Беларусь ҳудудидан Украина ҳарбий объектларига «Искандар» ракета тизимлари билан ҳужум қилган, Россиянинг 20 минг қўшинлари мамлакат ҳудудидан Украинага кирган.