Ғарбий Антарктидадаги Туэйтс музлиги сув ҳароратининг кўтарилгани боис жадал эримоқда. Бу жараённинг тугаши жаҳон океанидаги сув сатҳининг ярим метрга кўтарилишига олиб келади, дейилади Nature илмий журналида чоп этилган мақолада.

Қайд этилишича, океанлар суви сатҳининг кўтарилиши бошқа музликлар ҳолатига ҳам таъсир кўрсатади ва оқибатда сувлар сатҳи яна уч метрга кўтарилади.

Туэйтс музлиги катталиги бўйича Флорида штатичалик келади. Reuters агентлигининг ёзишича, илмий муҳитда уни «охирзамон музлиги» деб аташади.

Олимларнинг аниқлашича, илиқ сув музликнинг пастки қатламидаги ёриқлар ва бошқа тешикларга кираётгани боис у йилига 30 метр тезликда эримоқда. Музликдаги сув ҳарорати музлаш ҳароратидан 1,5 даражага юқори. Тадқиқот ҳаммуаллифларидан бири, Корнелл университети ходими Бритни Шмидтнинг таъкидлашича, Туэйтс музилининг эриш масаласи — «барчамиз хавотирланишимиз керак бўлган нарсадир».

Аввалроқ олимлар ушбу музлик охирги икки асрда кутилганидан тезроқ эришни бошлагани тўғрисида хулосага келган. Тадқиқотчилар 200 йил олдин музлик асоси денгиздан йилига 2,1 километр тезликда чекинганини аниқлаган — бу сўнгги 10 йилда кузатилган кўрсаткичлардан икки баробар кўпдир.

Аввалроқ NASA барча музлар эриши оқибатида Ерда қандай ҳолат юзага келишини кўрсатганди. Шунингдек, Жанубий қутбда совуқ ҳарорат бўйича антирекорд қайд этилган, Тожикистонда мингдан ортиқ музликлар эриши мумкинлиги айтилганди.