Қамчиқ довонида қор кўчди, бундан аввал автомобиль ҳаракати вақтинча тўхтатилганди — фото
«Ўзгидромет» ходими Эркин Абдулахатов Қамчиқ довонининг 234 ҳамда 239 километрларида қор кўчиб тушганини маълум қилди.
Тошкент—Ўш автомобиль йўлининг Қамчиқ довонидан ўтувчи қисми чоршанба куни соат 22:40 лар атрофида қор кўчиши хавфи туфайли транспортлар ҳаракати учун вақтинча ёпилганди. «Ўзгидромет» 16 февраль, тунги соат 01:30 дан бошлаб йўлнинг 228−253-километр қисмида қор кўчиши мумкинлигидан огоҳлантирди.
Ўзбекистон ФВВ маълумотига кўра, тунда фавқулодда вазиятлар вазири Абдулла Қўлдошев довонга борган ва қор кўчкисидан огоҳлантириш ҳамда унинг оқибатларини бартараф этиш ишларига бошчилик қилган.
«Фуқароларни манзилларига етказиш мақсадида Оҳангарон ва Ангрендан Фарғона водийси йўналишида қўшимча поездлар қатнови амалга оширилмоқда. Хоҳловчилар учун эса довоннинг ўзида исиниш нуқталари ҳам ташкил этилди», дейилади хабарда.
Мавзуга доир: Амирсой дам олиш масканида қор кўчиши кузатилди — фото
Эслатиб ўтамиз, февраль бошида ноқулай об-ҳаво сабаб Тошкент—Ўш автомобиль йўлининг Қамчиқ довони худудида ҳамда М-39 Тошкент—Шаҳрисабз—Термиз автойўлининг Тахтақорача (Китоб) довонидан ўтган қисмида қор ёққан, шунингдек, туман тушиши натижасида йўлларда кўринувчанлик 50 метргача қисқарган эди.
