АҚШ Давлат департаменти Украинанинг Қримдаги ҳарбий объектларга зарбаларини қўллаб-қувватлади
АҚШ ҳатто уруш тугаганидан кейин ҳам Украинага ҳарбий ёрдам кўрсатишда давом этади
АҚШ Украина томонидан Қримдаги Россия ҳарбий объектларига зарбалар берилишини қўллаб-қувватлайди. Бу ҳақда мамлакат давлат котибининг ўринбосари Виктория Нуланд 16 февраль куни Карнеги маркази билан видеоалоқа вақтида маълум қилди.
«Россия Қримда кўплаб ҳарбий иншоотларни қурди, Украинанинг амалга оширмоқчи бўлган зарбалари қонуний ва биз буни қўллаб-қувватлаймиз. Ҳеч бўлмаганда Қрим демилитаризация қилинмагунига қадар Украина хавфсиз бўлмайди», — дейди Нуланд.
Унинг қўшимча қилишича, ҳатто уруш тугаганидан кейин ҳам АҚШ Украинага ҳарбий ёрдам кўрсатишда давом этади, чунки Россия можарони қайта тикламаслигига кафолат йўқ.
Шу куннинг ўзида Давлат департаментида ўтказилган брифингда Виктория Нуланд АҚШ Украинанинг Россия томонидан эгаллаб олинган ҳудудларини қайтариб олиш истакларини қўллаб-қувватлашини айтган. «Украина ўз ерларини халқаро чегаралар доирасида қайтариб олиш учун курашяпти. Биз уларни бу борада ҳам, ўз ҳудудини қайтариб олиш йўлидаги кейинги ҳужумларга тайёргарликда ҳам қўллаб-қувватлаймиз», — дейди Нуланд.
Шу билан бирга, Давлат департаменти раҳбари ўринбосарининг сўзларига кўра, бир йилдан бери давом этаётган уруш давомида Россия 200 мингдан ортиқ ҳарбийсидан айрилган.
Аввалроқ Зеленский ҳукумати Украина ҳарбий йўл билан 1991 йилги чегараларни қайтариб олишига Пентагон шубҳага бораётганидан «дарғазаб бўлганди». Киевнинг таъкидлашича, Америка разведкаси Украина Қуролли Кучларининг имкониятлари борасида олдин ҳам хато қилган. АҚШ Штаб бошлиқлари бирлашган қўмитаси раиси генерал Марк Милли январь охирида шу каби баҳони берганди. У 2023 йилда Украина армиясига 1991 йилги чегараларга қайтиш «ҳарбий йўл билан жуда ва жуда қийин эканини» маълум қилган.
Мавзуга доир: «Россия ҳужумни аллақачон бошлаб бўлди» — Зеленский
Қрим 2014 йилда референдум натижалари бўйича Россия таркибига қўшилганди. Украина ҳукумати ва Ғарб давлатлари ушбу овоз бериш жараёнларини тан олмаган ва содир бўлаган воқеани аннексия деб ҳисоблаган. Россия президенти Владимир Путин яриморол аҳолиси ўз танловини амалга оширган ва Қримнинг тарихан қаерга тегишли экани тўғрисидаги масала ёпилганини маълум қилганди.
