Голливуд юлдузи Брюс Уиллисга манглай-чакка деменция (тафаккур бузилиши) ташхиси қўйилди. Бу ҳақда 67 ёшли актёрнинг оиласи маълум қилди.

2022 йил мартда Уиллиснинг яқинлари у нутқининг бузилиши сабаб актёрлик карьерасини якунлаётганини эълон қилганди. Шундан кейин касаллик ривожланиб борган, ҳозирда шифокорлар аниқ ташхисни қўйишга муваффақ бўлган.

«Манглай-чакка деменцияси (МЧД) — кўпчилик эшитмаган ва исталган инсонда кузатилиши мумкин бўлган оғир касаллик. 60 ёшдан кичикларда ушбу касаллик деменциянинг энг кенг тарқалган тури ҳисобланади ва уни аниқлашга йиллар кетиши мумкинлиги сабаб МЧД кенг тарқалиб бўлади. Бугунги кунда мазкур касалликни даволаш усули йўқ ва умид қиламизки, яқин йилларда бунинг ҳам йўли топилади. Брюснинг аҳволи оғирлашиб борар экан, биз оммавий ахборот воситаларининг эътиборини кўпроқ хабардорлик ва тадқиқотни талаб қиладиган ушбу касалликни ёритишга қаратишга умид қиламиз», дейилади актёр оиласининг хабарида.

Брюс Уиллис фаолияти давомида 150 дан ортиқ фильмларда суратга тушган ва Голливуднинг энг юқори ҳақ тўланадиган актёрларидан бири ҳисобланади. Энг машҳур кинолари орасида «Олтинчи ҳиссиёт», «Бешинчи элемент», «12 маймун», «Охирги бойскаут», «Армагеддон», Слевиннинг омадли сони», «Жиноий чўпчак» ва «Қаттиқ ёнғоқ» каби ўнлаб фильмлар бор.