Қорақалпоғистон Республикаси ва Хоразм вилоятида 17–19 февраль кунлари бир оз ёғингарчилик фақат айрим жойларда бўлиши мумкин. Бухоро ва Навоий вилоятларида кучсиз ёмғир фақат эрталаб ёғади. Бу ҳақда «Ўзгидромет» хабар берди.

Қайд этилишича ҳаво ҳарорати 5–10 даража илиқ, шимолда 0–5 даража илиқ атрофида бўлади.

Шанба куни республика ҳудудининг катта қисмида ёғингарчилик тўхтайди, фақат республика жануби-шарқий ҳудудларининг баъзи жойларида бир оз ёмғир ёғади. Якшанба куни Ўзбекистоннинг барча ҳудудларида ёғингарчиликсиз об-ҳаво бўлиши кутилмоқда. Республика бўйича баъзи жойларга туман тушиши кузатилади.

Ҳаво ҳарорати кечаси 0–5 даража илиқ атрофида, баъзи жойларда 2 даражагача совуқ бўлади, кундуз куни эса ҳаво 7–12 даражагача илиқ бўлади.

17 февраль куни Тошкент шаҳрида вақти-вақти билан ёмғир ёғади, дам олиш куни ёғингарчилик кутилмайди. Кечаси ва эрталаб туман тушиши мумкин. Ҳарорат кечаси 0–3 даража илиқ, кундузи шанба куни 8–10 даража илиқ, якшанба куни 10–12 даража илиқ бўлади.

Республиканинг тоғолди ва тоғли ҳудудларида 17–18 февраль кунлари сел-сув тошқин ҳодисалари юзага келиши мумкин.

«Тоғли ҳудудларда дам олиш кунлари қор кўчиши хавфи сақланиб туради. Қор беқарор ҳолатда бўлади, тоғларга борганингизда жуда эҳтиёт бўлинг», дейилади хабарда.

Эслатиб ўтамиз, 3 февралдан Ўзбекистон ҳудудига Каспий денгизи ҳудудларидан нам ҳаво массалари кириб келиши бошлаганди. Шундан кейин ҳаво ҳарорати 20 даражагача исиди. Республика Гидрометеорология маркази 10 февраль куни Ўзбекистоннинг айрим ҳудудларига қор ёғишини маълум қилди. 13 февраль куни эса баъзи жойларда ҳарорат 12 даражагача исиди. Биз неча кундан бери мамлакатнинг турли ҳудудларига ёмғир ёғмоқда.