Жиззахда тунги хизмат вақтида бегона аёл билан қўлга тушган «участкавой» ишдан олинди — видео
Шунингдек, ИИБнинг 4 нафар раҳбар ходимига нисбатан интизомий чора қўлланилган
Аввалроқ Жиззахда «участкавой» тунги хизмат вақтида бегона аёл билан қўлга тушгани ҳақида хабар берилганди. Вилоят ИИБ ушбу ҳолат юзасидан ўтказилган текширув натижлари бўйича маълумот берди.
Маълум қилинишича, ижтимоий тармоқларда тарқалган хабарлардан кейин ички ишлар вазирининг ўринбосари, генерал-майор Азиз Икромов назоратида хизмат текшируви ўтказилиб, воқеага ойдинлик киритиш чоралари кўрилган. Суриштирув давомида аниқланишича, Жиззах вилояти Ғаллаорол тумани ИИБ 2-сонли ИИБ ЖХХ ҳуқуқбузарликлар профилактикаси гуруҳи профилактика инспектори Ж.Х.нинг бир неча нафар шахслар билан келишмовчилиги юзага келган.
Олиб борилган ўрганиш натижаларига кўра, капитан Ж.Х.нинг Ички ишлар органлари ходимларининг касбий маданият ва хизмат интизоми кодекси ҳамда Ички ишлар органларида хизмат ўташ тартиби тўғрисидаги низомнинг бир қатор бандларини бузгани аниқланиб, ушбу ходим ички ишлар органлари хизматидан бўшатилди.
Шунингдек, Ғаллаорол тумани ИИБнинг 4 нафар раҳбар ходимига профилактика инспекторининг фаолияти устидан етарли назорат ўрнатмагани учун интизомий чоралар қўлланилди.
Қайд этилишича, юқоридагилар билан бир қаторда, воқеанинг айрим иштирокчиларининг хатти-ҳаракатларида Маъмурий жавобгарлик тўғрисидаги кодекснинг айрим моддаларида ифодаланган ҳуқуқбузарлик аломатлари аниқлангани сабабли тўпланган ҳужжатлар кўриб чиқиш ва қонуний қарор қабул қилиш учун Жиноят ишлари бўйича Ғаллаорол тумани судига юборилган.
Мавзуга доир: Тошкентда «участкавой» қизнинг номусига теккани айтилди
Аввалроқ Сурхондарё вилояти Ички ишлар бошқармаси ижтимоий тармоқларда тарқалган, бир неча эркак ўқувчи қизнинг номусига теккани айтилган хабар юзасидан расмий муносабат билдирганди.
