Шавкат Мирзиёев номига Америка Қўшма Штатлари президенти Жо Байдендан мактуб келди. Бу ҳақда Президент матбуот котиби Шерзод Асадов хабар берди.

Мактубда Жо Байден Шавкат Мирзиёевга АҚШ ва Ўзбекистон ўртасидаги муносабатларни мустаҳкамлашда кўрсатаётган етакчилиги ва шахсий интилиши учун, шунингдек, хавфсизлик соҳасидаги ҳамкорлик учун миннатдорлик билдирган.

«АҚШ ва Ўзбекистон ўртасидаги стратегик шериклик чуқурлашиб бормоқда ва эришилган ютуқларни 2023 йилда ҳам янада илгари суришимизга умид билдираман. Сиз Марказий Осиёдаги бешта мамлакатнинг минтақавий ҳамкорлигини кенгайтириш орқали қўшни мамлакатлар билан муносабатларни ривожлантиришга катта эътибор қаратаётганингизни алоҳида қайд этмоқчиман.

Бу саъй-ҳаракатлар Марказий Осиёда ва унинг ташқарисида равнақ ва барқарорликни таъминлашга катта ҳисса қўшмоқда. Бизнинг шериклигимиз, мана 30 йилдирки, БМТнинг барча мамлакатларнинг мустақиллиги, суверенитети ва ҳудудий яхлитлигини ҳурмат қилишдек асосий принципларига риоя қилиш асосида ривожланди.

Ишончим комилки, ушбу қадриятларга муштарак содиқлигимиз ўзаро алоқаларимиз узоқ муддатли истиқболда янада мустаҳкамланишига хизмат қилади.

Ҳурмат билан, Жо Байден», дейилади Байденнинг мактубида.

Шунингдек, АҚШ президенти Ўзбекистон билан иқтисодиёт ва энергетика масалаларида ўзаро алоқаларни ривожлантириш ҳамда мамлакатдаги ислоҳотларни қўллаб-қувватлашга тайёрлигини билдирган.

Аввалроқ АҚШ президенти Жо Байден Шавкат Мирзиёевни Наврўз байрами билан табриклаганди.