Ўзбекистонда 15 февраль куни 2,6 миллиард сўм ёки 30 мингта хонадоннинг бир ойлик истеъмолига тенг ҳажмдаги электр энергиясидан ноқонуний фойдаланиш ҳолатлари аниқланди. Бу ҳақда «Ўзэнергоинспекция» матбуот хизмати хабар берди.

Қайд этилишича, «Ўзэнергоинспекция» ва ҳуқуқни муҳофаза қилувчи органлар билан ҳамкорликда ўтказилган назорат тадбирларида 119 та ҳолатда 6,3 миллион киловатт соат миқдоридаги (жами 2,6 миллиард сўм) электр энергиясидан ноқонуний фойдаланиш ҳолатлари аниқланган.

Ушбу ҳажмдаги электр энергияси ўртача 30 мингта хонадоннинг бир ойлик истеъмолини ташкил қилади. Мисол учун:

• Наманган шаҳрида жойлашган «Истиқилол Жавоҳири» МЧЖ электр тармоғига ўзбошимчалик билан уланиши оқибатида 646 миллион сўм;
• Қўшработ туманида жойлашган «Замин Сирожхон» фермер хўжалиги электр тармоғига ўзбошимчалик билан уланиши оқибатида 275 миллион сўм;
• Бўстонлиқ туманида «Сардор-Сарвар-Акмал Строй» МЧЖ электр тармоғига ноқонуний уланиши орқали 187 миллион сўм қайта ҳисоб-китоб амалга оширилди.

Аввалроқ Ўзбекистонда 2022 йилнинг 11 ойи давомида тадбиркорлик субъектлари томонидан 58,4 миллиард сўмлик электр энергиясидан ноқонуний фойдаланилгани аниқланганди. Шунингдек, Ўзбекистонда 71 минг хонадоннинг бир ойлик истеъмолига тенг электр энергиясидан ноқонуний фойдаланилгани маълум бўлган эди.

Эслатиб ўтамиз, аввалроқ Энергетика вазири энерготизимда режали чекловлар киритилмаса, Ўзбекистон жиддий талафот кўриши мумкинлигини айтгани, Тошкентдаги газ қуйиш шохобчалари вақтинча ёпилгани, Ўзбекистонда давлат ташкилотлари машиналарига метан газ қуйиш тақиқлангани ҳамда Тошкентдаги кўча чироқларини ўчириш бошлангач қанча электр энергияси тежалаётгани ҳақида хабар берилганди.