Қамчиқ довонида машиналар ҳаракати қайта тикланди
Масъуллар довонда қор кўчкиларининг қайта кўчиш хавфини бартараф этиш бўйича ишлар олиб борган
Қамчиқ довони йўли барча турдаги транспорт воситаларининг ҳаракати учун очилди, деб хабар беради Фавқулодда вазиятлар вазирлиги матбуот хизмати.
15 февраль соат 22:40 да қор кўчкиси хавфи туфайли Қамчиқ довони автотранспорт воситалари ҳаракати учун вақтинча ёпилган эди. Довон ёпилганидан сўнг кучли қор ёғиши сабабли ушбу йўналишнинг бир нечта қисмларида қор кўчиши кузатилган.
Республика идоралараро штабининг тезкорлик билан қабул қилинган довонни ёпиш тўғрисидаги қарори туфайли қор кўчкиси оқибатида ҳеч ким зарар кўрмаган. Шу вақт мобайнида Фавқулодда вазиятлар вазирлиги раҳбарлигида ихтисослаштирилган тузилмалар томонидан қор кўчкиларининг қайта кўчиш хавфини бартараф этиш бўйича ишлар олиб борилган.
Фавқулодда вазиятлар вазирлигининг раҳбарлигида Мудофаа вазирлигининг кучлари ва воситалари ёрдамида 5 та қорли тоғ ёнбағри хавфсиз ҳолатга келтирилган. Кўрилган тезкор чора-тадбирлардан сўнг 16 февраль соат 21:00 дан довондан ҳаракатланувчи барча турдаги автотранспорт воситалари учун икки томонлама ҳаракат тўлиқ қайта тикланган.
«Барча ҳайдовчилардан эҳтиёткор бўлишларини, оралиқ масофани сақлаб, тезликни меъёридан оширмасдан ҳаракатланишларини сўраймиз», дейилади ФВВ хабарида.
Мавзуга доир: Қамчиқ довонида қор кўчди, бундан аввал автомобиль ҳаракати вақтинча тўхтатилганди — фото
Аввалроқ Қамчиқ ҳамда Тахтақорача довонларида кучли ёғингарчилик кузатилиб, кўрувчанлик кескин қисқариши ҳамда Қамчиқ довонида 3 та юк машинаси ёниб кетиши оқибатида ҳайдовчилар ҳалок бўлгани ҳақида хабар берилганди.
