Қозоғистонлик бизнесмен Тимур Турловга тегишли бўлган Freedom Holding молиявий компанияси Американинг Maxim Group LLC инвестиция банки ҳамда унинг шўбаси Maxim Financial Advisors’ни сотиб оляпти. Бу ҳақда холдинг сайтида келтирилган хабарда сўз боради.

Кечиктирилган тўловлар ва ушлаб қолиш бонусларини ўз ичига олган келишув 400 миллион долларни ташкил этади. У Америка регуляторлари томонидан маъқуллангач, ёпилади.

Турловнинг маълум қилишича, битим холдингнинг АҚШдаги фаолиятини кенгайтиради. 2020 йил декабрда у Американинг Prime Executions брокерини сотиб олганди.

Maxim Group’га 2002 йилда асос солинган бўлиб, у инвестиция банки, брокерлик ва таҳлилий фаолият билан шуғулланади. Сўнгги 10 йил ичида банк 1110 битим тузиб, капитал бозорига 80,6 миллиард доллардан ортиқ маблағ жалб этган.

Freedom Holding АҚШда рўйхатдан ўтган, компаниянинг бош офиси ва унинг асосий ижро органлари Қозоғистонда жойлашган. Холдингга Турлов асос слоган, Forbes унинг бойлигини 2,4 миллиард долларга баҳолаган. Июнь ойида журнал бизнесмен Россия фуқаролигидан воз кечиб, Қозоғистон фуқаросига айлангани тўғрисида ёзганди; у ушбу мамлакатда оиласи билан 10 йилдан ортиқ вақтдан бери яшаб келади.

Октябрь охирларида Freedom Holding ўзининг Россиядаги активлари — Freedom Finance инвестиция компанияси ва Freedom Finance банкини сотиб юборганди.

Аввалроқ келиб чиқиши ўзбек бўлган бизнесмен Алишер Усмонов Россия саноатчилар ва тадбиркорлар иттифоқи (РСТИ) Бошқарув бюроси аъзолигидан озод этилишини сўраб ариза ёзганди. Усмоновнинг РСТИ раҳбари номига ёзилган аризаси суратида қайд этилишича, у «нафақага чиқаётгани ва фаол меҳнатдан кетаётгани» туфайли Бюро аъзолигидан чиқаришларини сўраган.