Россия армиясининг баҳорда Украинага уюштириши режалаштирилган ҳужуми аллақачон бошланган. Бу ҳақда Владимир Зеленский BBC’га берган интервьюсида маълум қилди.

«Россия ҳужумлари ҳозирда бир нечта йўналиш бўйича амалга оширилмоқда» — дейди Украина президенти.

Унинг таъкидлашича, Украина Қуролли Кучлари контрҳужумга ўтмагунига қадар ҳужумларни қайтариб туради. Аммо бунинг учун Украинага Ғарбдан кўпроқ қуроллар керак бўлади. «Қуроллар — бу Россия тушунадиган ягона тил», — дейди Зеленский.

Бундан ташқари, президентнинг айтишича, Украина ҳеч қанақа ҳудудий ён босишларни амалга оширмайди ва Владимир Путин билан муросага бормайди.

«Бугун бизнинг омон қолишимиз, бирлигимиз — ягона мақсаддир. Биз Европа томон боряпмиз, Украина шу йўлни танлади. Буларнинг барчасини қўлдан чиқариб бўлмайди. Украина хавфсизлик кафолатини истайди, барчамиз бирлашувни хоҳлаймиз. Шундай экан, ҳар қандай ҳудудий жиҳатдан муросага бориш фақатгина бизнинг давлатимизни кучсизлантиради. Гап ‘муроса’ сўзида эмас. Нега ундан қўрқиш керак? Бизда ҳаёт учун миллионлаб муроса бор. Улар ҳар куни содир бўлмоқда. Масала — ким билан эканлигида. Путин билан муроса? Йўқ! Нега? Чунки унинг иймони йўқ», — дейди у.

Аввалроқ Россия қўшинлари 15 февраль куни Украина ҳудудига авиация ва денгиздан 32 та қанотли ракета билан зарба берганди. Украина Қуролли Кучлари Ҳарбий-ҳаво кучлари маълумотларига кўра, ҳаво ҳужумидан мудофаа кучлари 14 та қанотли ракетани ҳамда иккита Kh-59 бошқариладиган ракеталарни уриб туширган. Қолган ракеталар эса Украина шимоли ва ғарбидаги, шунингдек, Днепропетровск ва Кировоград вилоятларидаги муҳим инфратузилма объектларига зарба берган.

Эслатиб ўтамиз, агарда Украина Қримни қайтариб олишга уринса, бу Россия учун қизил чизиққа айланиши, шу сабабдан АҚШ Москванинг «кенг кўламли жавоби»ни юзага келтирмаслик учун украин Қуролли Кучларининг бундай операцияни бошлашини рағбатлантирслиги маълум бўлганди.

Зеленский ҳукумати Украина ҳарбий йўл билан 1991 йилги чегараларни қайтариб олишига Пентагон шубҳага бораётганидан «дарғазаб бўлганди». Киевнинг таъкидлашича, Америка разведкаси Украина Қуролли Кучларининг имкониятлари борасида олдин ҳам хато қилган. АҚШ Штаб бошлиқлари бирлашган қўмитаси раиси генерал Марк Милли январь охирида шу каби баҳони берганди. У 2023 йилда Украина армиясига 1991 йилги чегараларга қайтиш «ҳарбий йўл билан жуда ва жуда қийин эканини» маълум қилган.