Россиянинг Altmax Holding компанияси Ўзбекистон энергетика вазири Жўрабек Мирзамаҳмудовга мактуб йўллади. Мактубда «Озодлик»да эълон қилинган материалга муносабат билдирилган.

«Компаниянинг аудиторлик текширувидан ўтган молиявий ҳисоботида ‘Ўзбекистон Мустақиллиги’ инвестиция блокига нисбатан Маҳсулот тақсимотига оид битим (МТБ)га ҳавола қилинган. Компаниянинг Ўзбекистондаги нефть ва газ операцияларини амалга ошириш ҳуқуқлари ушбу МТБга нисбатан кўрсатилган.

Қайд этилишича, МТБда қўлланиладиган атамалар аудит қилинган молиявий ҳисоботда катта ҳарфлар билан акс эттирилади. Ҳисоботда кўрсатилган ‘Нефть ва газ операциялари’ (катта ҳарф билан) атамаси, МТБ қоидаларига мувофиқ, инвесторнинг белгиланган иш ҳажмини (геология-қидирув, конларни ўзлаштириш, табиий газ ва олтингугуртни қазиб олиш, қайта ишлаш, ташиш ва ҳоказо) бажариш бўйича фаолияти сифатида белгиланади. Ва бу фақат МТБда кўрсатилган ‘Мустақилликнинг 25 йиллиги’ конининг шартнома ҳудудлари доирасида ташкил этилади», дейилади компаниянинг Ўзбекистон энергетика вазири Жўрабек Мирзамаҳмудовга йўллаган мактубида.

Шунингдек, Altmax Holding ўз мактубида «Озодлик» радиоси журналистларини виждонсизларча ибораларни контекстдан юлиб олиш ва нотўғри талқин қилишда айблаган.

«Журналистлар мақоласида ибораларни контекстдан юлиб, тушунчаларни алмаштириш бор, деб ҳисоблаймиз. Журналистлар асосий ҳарфларни олиб ташлаш ва шу тариқа юридик атамани умумий фуқаролик тушунчаси билан алмаштириб қўйиш орқали компаниянинг нефть ва газ операциялари ҳудуди бўйича ўз ўқувчиларини атайлаб чалғитдилар», дейилади мактубда.

Аввалроқ энергетика вазири Жўрабек Мирзамаҳмудов ва «Ўзбекнефтгаз» раиси Меҳриддин Абдуллаев журналист ҳамда блогерлар билан учрашувда «Озодлик радиоси» томонидан эълон қилинган суриштирувга кўра, Ўзбекистондаги барча нефть ва газ конларининг эксклюзив ҳуқуқлари Россияга бериб юборилганини асоссиз маълумотлар деб атаганди.