Тошкентда пора билан ушланган судьяни жиноий жавобгарликка тортишга рухсат берилди
Аввалроқ Жиноят ишлари бўйича Тошкент шаҳар Яшнобод туман суди судьяси 4 минг долларни пора тариқасида олаётганда қўлга олингани ҳақида хабар берилганди. Судьялар олий кенгаши бош прокурор тақдимномасига мувофиқ пора билан қўлга тушган судьяни жиноий жавобгарликка тортишга рухсат берди.
Судьялар олий кенгашининг 17 февраль куни бўлиб ўтган навбатдан ташқари йиғилишида бош прокурорнинг Тошкент шаҳар жиноят ишлари бўйича Яшнобод туман суди судьяси И.Б.ни Жиноят кодексининг 210-модда (пора олиш) 3-қисми билан жиноий жавобгарликка тортишга оид тақдимномаси муҳокама қилинди.
Йиғилишда кенгаш хулосаси билан И.Б.ни жиноий жавобгарликка тортишга розилик берилди ва унинг судьялик ваколати тўхтатилди. Шунингдек, қайд этилишича, тергов сири ва айбсизлик презумпцияси талабларидан келиб чиқиб, бошқа тафсилотлар ошкор қилинмаслиги айтилган.
Мавзуга доир: Тошкентда судья 2,5 минг доллар пора билан ушланди
Эслатиб ўтамиз, аввалроқ Олий суд раиси Козим Комилов судлар 2016 йилгача бўлган даврга нисбатан очиқ ва мустақил эканини айтганди, шунингдек, Хоразмда «замҳоким» 12 минг доллар пора билан қўлга тушгани ҳақида хабар берилганди.
